சட்டசபை தேர்தலில், த.வெ.க., முதன்முறையாக போட்டியிட உள்ளது. அக்கட்சிக்கு சின்னம் ஒதுக்கீடு செய்யக் கோரி தேர்தல் கமிஷனிடம் விண்ணப்பிக்கப்பட்டது. அதன் அடிப்படையில், 234 சட்டசபை தொகுதிகளுக்கும் பொது சின்னமாக, 'விசில்' ஒதுக்கப்பட்டுள்ளது. த.வெ.க., தேர்தல் கமிஷனின் அங்கீகாரம் பெறாத கட்சி என்பதால், விசில் சின்னம் இந்த ஒரு தேர்தலுக்கு மட்டுமே வழங்கப்பட்டுள்ளது.

இது குறித்து, த.வெ.க., சமூக ஊடகப்பிரிவு துணை பொதுச்செயலர் நிர்மல்குமார் கூறுகையில், “தேர்தல் கமிஷனிடம் அளித்த விருப்ப படிவத்தில், முதல் விருப்பமாக விசில் சின்னத்தை குறிப்பிட்டிருந்தோம். அத்துடன் ஆட்டோ, மோதிரம் என 10 சின்னங்களை பரிந்துரைத்திருந்தோம். இதில், விசில் சின்னத்தை விஜய் விரும்பி கேட்டிருந்தார். அவருக்கு பிடித்த விசில் சின்னமே ஒதுக்கப்பட்டுள்ளது,” என்றார்.

இதற்கிடையில், காங்கிரஸ் கட்சியின் தரவு பகுப்பாய்வு பிரிவு தலைவர் பிரவீன் சக்கரவர்த்தி தன் 'எக்ஸ்' பக்கத்தில், 'தமிழக சட்டசபை தேர்தலுக்கான விசில் ஊதப்பட்டு விட்டது; அனைத்து கட்சிகளும் இப்போது தயாராகி விட்டன' என பதிவிட்டுள்ளார். இது, காங்கிரஸ் கட்சியில் உள்ள விஜய் ஆதரவாளர்களுக்கு மகிழ்ச்சியை அளித்துள்ளது.