ஆப்கனில் அமெரிக்கப் பெண் பாயே ஹால் என்பவரை தலிபான்கள் இரண்டு மாதங்களுக்கு முன் சிறைபிடித்தனர். எந்தவிதமான அனுமதியும் இன்றி டிரோன் கேமரா உதவியுடன் அவர் படம் பிடித்தார் என்ற குற்றச்சாட்டின் கீழ் கைது செய்யப்பட்டார். சிறையில் அடைக்கப்பட்டிருந்த அவரை விடுவிப்பதற்கு அமெரிக்கா தீவிர முயற்சி மேற்கொண்டது.

தற்போது அமெரிக்க அரசுக்கும், தலிபான்களுக்கும் இடையே சமாதான தூதுவராக செயல்படும் கத்தார் நாட்டின் முயற்சியால் பாயே ஹால் விடுவிக்கப்பட்டார். ஹால் காபூலில் உள்ள கத்தார் தூதரகத்தில் மருத்துவ பரிசோதனைகளுக்குப் பிறகு நல்ல ஆரோக்கியத்துடன் இருப்பது உறுதி செய்யப்பட்டது. அவர் அமெரிக்கா திரும்புவதற்கான ஏற்பாடுகள் தற்போது நடந்து வருகின்றன.

ஹாலின் படத்தைப் பகிர்ந்துகொண்டு, ஆப்கானிஸ்தானுக்கான அமெரிக்காவின் முன்னாள் தூதர் ஜல்மே கலீல்சாத் கூறியிருப்பதாவது: தாலிபான்களால் விடுவிக்கப்பட்ட அமெரிக்க பெண் ஹால், இப்போது காபூலில் உள்ள எங்கள் நண்பர்களான கத்தார் மக்களின் பராமரிப்பில் இருக்கிறார், விரைவில் வீடு திரும்புவார். இவ்வாறு அவர் கூறினார்.

ஹாலின் வீடியோவை டிரம்ப் சமூக வலைதளத்தில் பகிர்ந்து மகிழ்ச்சி அளிப்பதாக குறிப்பிட்டுள்ளார்.