கொட்டாவி என்பது உடலின் இயற்கையான அனிச்சை செயல்தான். இருப்பினும், சில சூழ்நிலைகளில் தூக்கக் கோளாறு அல்லது சில நரம்பியல் பிரச்னைகளுடன் தொடர்புடைய அறிகுறியாகவும் இருக்கலாம்.

கொட்டாவி ஏன் வருகிறது? அறிவியலும் காரணங்களும்!

கொட்டாவி என்பது நம் உடலில் முற்றிலும் தன்னிச்சையாக ஏற்படும் ஒரு இயல்பான செயலாகும். நாம் கொட்டாவி விடும்போது வாய் மற்றும் சுவாசப்பாதை விரிவடைந்து, ஆழமாக காற்றை உள்ளிழுக்கும் செயல்முறை நடைபெறுகிறது. இந்தச் செயல்பாட்டின் போது தொண்டை மற்றும் முகத்தைச் சுற்றியுள்ள பல தசைகள் ஒன்றிணைந்து செயல்படுகின்றன.

கொட்டாவி எதனால் ஏற்படுகிறது என்பதற்கான ஒரே ஒரு குறிப்பிட்ட காரணம் இதுவரை அறிவியல் பூர்வமாக முழுமையாகக் கண்டறியப்படவில்லை. இருப்பினும், தூக்கமின்மை, உடல் சோர்வு மற்றும் சலிப்பு (Boredom) போன்ற சூழ்நிலைகளில் கொட்டாவி வருவது இயல்பு. சில நேரங்களில் அதிக மன அழுத்தம் ஏற்படும்போதும் கொட்டாவி வரக்கூடும்.

மற்றொருவர் கொட்டாவி விட்டால் நமக்கும் ஏன் வருகிறது?

அருகில் இருப்பவர்கள் யாராவது கொட்டாவி விடுவதைப் பார்த்தாலோ அல்லது கொட்டாவியைப் பற்றி நினைத்தாலோ நமக்கும் உடனடியாக கொட்டாவி வருவது பலரும் அனுபவித்த நிகழ்வுதான்.

கொட்டாவி என்பது தன்னிச்சையான ஒரு அனிச்சைச் செயல் என்பதால், மற்றவர்கள் கொட்டாவி விடுவதைப் பார்ப்பது, கேட்பது அல்லது அதைப் பற்றிச் சிந்திப்பது கூட நம் மூளையைத் தூண்டி நமக்கும் கொட்டாவியை வரவழைத்து விடுகிறது.

கொட்டாவி விடும்போது உடலில் என்ன நடக்கிறது?

கொட்டாவி என்பது வெறும் வாய் திறந்து மூடும் சாதாரணச் செயல் அல்ல; அதற்குள் பல உடல் உறுப்புகளின் ஒருங்கிணைந்த இயக்கம் அடங்கியுள்ளது. இந்தச் செயல்பாட்டின் போது மார்பு, தொண்டை, முகம் மற்றும் சுவாசத்துடன் தொடர்புடைய பல தசைகள் ஒன்றிணைந்து செயல்படுகின்றன.

வாய் அகலமாகத் திறக்கப்பட்டு, சுவாசத் தசைகள் மற்றும் விலா எலும்புகளைச் சுற்றியுள்ள தசைகள் தீவிரமாகச் செயல்படுவதால் நாம் காற்றை ஆழமாக உள்ளிழுக்கிறோம். சிலருக்குக் கொட்டாவி விடும்போது உடலின் மற்ற பகுதிகளையும் சேர்த்து நீட்டுவது (Stretch) போன்ற அசைவுகள் ஏற்படும். இதை 'நீட்சி கொட்டாவி' என்று குறிப்பிடலாம்.

கொட்டாவி விடும்போது முகத்தைச் சுளிப்பது அல்லது கண்களில் லேசாக நீர் கசிவது போன்றவையும் இயல்பாகவே பலருக்கு ஏற்படுவதுண்டு. கொட்டாவி முடிந்த பிறகு, உடல் சற்று தளர்வடைந்ததாகவும் ஒருவித திருப்தியான அல்லது புத்துணர்ச்சியான நிலையையும் சிலருக்கு உணர முடியும்.

இரவில் நன்றாகத் தூங்கியதாக நீங்கள் நினைத்தாலும், மறுநாள் காலையில் அதிக சோர்வு, தூக்கக் கலக்கம் அல்லது பகல் முழுவதும் தொடர்ந்து கொட்டாவி வருவது போன்ற அறிகுறிகள் இருந்தால், அதை அலட்சியப்படுத்தாமல் மருத்துவரின் ஆலோசனையைப் பெறுவது மிகவும் நல்லது.