குடகு மாவட்டம், இயற்கை காட்சிகள் சூழ்ந்த அழகான மாவட்டமாகும். ஜீவநதி காவிரி உற்பத்தியாகும் திருத்தலமாகும். குடகில் ஆறு, மலைகள், நீர் வீழ்ச்சிகள், கோவில்கள் என, அனைத்தும் உள்ளன. பசுமையான காபி தோட்டங்கள், எஸ்டேட்டுகள் உள்ளன. காவிரி நிசர்க தாமா தீவும் மக்களை கவர்கிறது.

குஷால் நகர் அருகில் உள்ள, காவிரி நிசர்க தாமா கோடைக்காலத்திலும் குளுகுளுவென்ற அனுபவத்தை அளிக்கிறது. வெளியே வெப்பம் தகிக்கும். காவிரி நிசர்க தாமாவுக்குள் நுழைந்து நடந்து சென்றால் வெயில் தெரியாது. வானுயரத்துக்கு நெடுநெடுவன வளர்ந்துள்ள மரங்கள், அதன் நடுவில் வளர்ந்துள்ள மூங்கில்கள், வெயில் உள்ளே வராமல் தடுக்கின்றன.

பழைய மூங்கில்கள் உலர்ந்து விழுந்தன. தற்போது புதிதாக மூங்கில்கள் வளர துவங்கியுள்ளன. இதனால் குளிர்ச்சியான, அழகான சூழ்நிலை உருவாகியுள்ளது. 40 ஆண்டுகளுக்கு முன், இது காடாக இருந்தது. மூங்கில் மரங்கள் மட்டுமே இருந்தன. பறவைகள், விலங்குகள் இருந்தன. சுற்றிலும் காவிரி ஆறு பாய்ந்தது. இங்கு வர யாருக்கும் தைரியம் இருக்கவில்லை.

ஆனால் இப்போது சூழ்நிலை மாறியுள்ளது. 65 ஏக்கர் பரப்பளவு கொண்ட இந்த தீவை, ஒரு அழகான சுற்றுலா தலமாக்க வேண்டும் என, அன்றைய வனத்துறை அதிகாரி தோர்வே மண்டல அதிகாரி நாராயண் விரும்பினர். அவரின் தொடர் முயற்சியால், 1989ல் காவிரி நிசர்கதாமா அமைந்தது. தற்போது குடகு மாவட்டத்தின் முக்கியமான சுற்றுலா தலமாக விளங்குகிறது. சுற்றுலா பயணியரை சுண்டி இழுக்கிறது.

காவிரி ஆற்றுக்கு குறுக்கே உள்ள தொங்கு பாலத்தில் நடப்பதற்காகவே, பெருமளவில் மக்கள் வந்தனர்.

தொங்கு பாலத்தில் தள்ளாடியபடி நடந்து, காவிரி நிசர்க தாமாவுக்கு செல்வதே, உல்லாசமான அனுபவத்தை அளிக்கும்.

தற்போது புதிதாக தொங்கு பாலம் கட்டப்பட்டிருந்தாலும், பழைய பாலமும் உள்ளது. இதன் பக்கத்திலேயே, மற்றொரு தீவும் உள்ளது. அந்த தீவையும் மேம்படுத்த வேண்டும் என, சுற்றுலா ஆர்வலர்கள் வலியுறுத்துகின்றனர்.

காவிரி நிசர்கதாமாவில், சுற்றுலா பயணியருக்கு பிடித்தமான யானை சபாரி, சிற்றுண்டி வசதி, படகு சவாரி உள்ளது. தங்குவதற்கு காட்டேஜ்களும் உள்ளன.

பரபரப்பான வாழ்க்கையில் இருந்து விடுபட்டு, சிறிது நேரம் அமைதியான சூழ்நிலையில் பொழுது போக்க விரும்புவோருக்கு, இது தகுதியான இடமாகும். இயற்கையின் மடியில் தவழ்ந்து, காவிரி ஆற்றங்கரையில் நடந்து, படகு சவாரி செய்து மகிழலாம்.

இது மனதுக்கும், உடலுக்கும் புத்துணர்ச்சி அளிக்கும்.