 சிட்ஜூ பப்பியின் தாயகம் திபெத். ஆனால், பின்னாளில் சீனர்கள் தான் இப்பப்பியை அதிகளவில் இனப்பெருக்கம் செய்து, மார்க்கெட்டில் அடையாளப்படுத்தினர்.

 இது அதிகபட்சம் 20-28 செ.மீ., உயரம்; 4-8 கிலோ எடை கொண்டது. உடல் முழுக்க மிருதுவான முடிகள் இருப்பதோடு, நிறைய நிறங்களில் காணப்படுகிறது.

 உயரத்தை விட நீளமான உடல், வட்டவடிவில் தலை, பெரிய கண்கள், சிறிய மூக்கு என, பார்ப்பதற்கே பொம்மை மாதிரி இருப்பதால், பலரும் இதை வளர்க்க விரும்புகின்றனர்.

 துறுதுறுவென எப்போதும் ஆக்டிவ்வாக சேட்டை செய்யும் இப்பப்பி அதீத புத்திசாலி. இதற்கு நீங்கள் பிரத்யேகமாக பயிற்சியாளர் வைத்து, பயிற்சி அளிக்க வேண்டுமென்ற அவசியமில்லை. அதனுடன் நீங்கள் நேரம் செலவிட்டாலே, உங்கள் சொல்பேச்சு கேட்கும்.

 தினசரி முடியை சீவிவிடுவது, இரு வாரத்திற்கு ஒருமுறை குளிப்பாட்டுதல், நகம் வெட்டிவிடுதல், காது சுத்தம் செய்தல் என, பராமரிப்பில் கூடுதல் கவனம் செலுத்த வேண்டியது அவசியம். இதற்கு குரூமிங் செய்யாவிடில், முடியில் முடிச்சுகள் விழ வாய்ப்பு அதிகம்.

 சிறிய வீடாக இருந்தாலும் இதை வளர்க்கலாம். இது, செல்லப்பிராணியாக மட்டுமே நடந்து கொள்ளும். பாதுகாப்பு பணிகளுக்கு பயன்படுத்த முடியாது. தனிமையில் இருப்போருக்கு ஏற்ற துணையாக இது இருக்கும்.

 பிறந்து ஒரு வயது வரை, ஒரு நாளைக்கு 50-60 கிராம் உணவு போதும். அதற்கு பின், தினசரி 100 கிராம் உணவு, அதன் வளர்ச்சிக்கு போதுமானது. ஆனால் இதில், 30 சதவீதம் புரதம் இருக்குமாறு பார்த்து கொள்ள வேண்டும் அதீத உணவு கொடுத்து, எடை அதிகரித்தால், நடக்க முடியாமல் சிரமப்படலாம்.

 இது, குறைந்த எடையுடன் இருப்பதால், பெரிய வகை செல்லப்பிராணிகளுடன் விளையாட அனுமதிக்கக்கூடாது. பிறந்ததில் இருந்தே, பிற விலங்குகளுடன் சேர்ந்து வளரும் பட்சத்தில் பாதிப்பில்லை.

 இப்பப்பியை, லசாப்சோ, பூடில், பிச்சான்பிரைஸ் போன்ற மற்ற சிறிய வகை பப்பிகளுடன் இனப்பெருக்கம் செய்து விற்பதை காண முடிகிறது. பப்பியாக இருக்கும் போது, இதை அடையாளம் காண முடியாது. வளரும் போது, இவற்றின் குணாதிசயம் மாறுவதோடு, நோய் பாதிப்புக்குள்ளாகவும் அதிக வாய்ப்புள்ளது.

 சிட்ஜூ வாங்குவதாக இருந்தால், அதன் பெற்றோர் யார், அதை பதிவு செய்ததற்கான சான்றிதழ், மரபு ரீதியான நோய்கள் ஏதுமில்லை என்பதை அறிந்து வாங்குவதே சிறந்தது.

 இதை எங்கு வேண்டுமானாலும் கொண்டு செல்லலாம். வயதானாலும் அதிக உயரம் வளராது என்பதால், வீட்டில் ஒரு குழந்தை இருப்பது போன்ற உணர்வு ஏற்படும்.

 இது, உரிமையாளரின் உணர்வுகளுக்கு ஏற்ப நடந்து கொள்ளும். அன்பை வெளிகாட்டி, ஆரத்தழுவி கொள்வதோடு, நிழல் போலவே சுற்றி சுற்றி வரும் என்பதால், சிட்ஜூவிற்கு ரசிகர் பட்டாளம் ஏராளம், என்றார்.