கால அட்டவணை

வெற்றிக்கு முதல் படி சரியான கால அட்டவணையை பின்பற்றுவது. கடைசி நேரத்தில் அவசர அவசரமாகப் படிப்பது பதற்றத்தையே தரும். தொடக்கத்திலிருந்தே ஒவ்வொரு பாடத்திற்கும் குறிப்பிட்ட நேரத்தை ஒதுக்கி, சுலபமான மற்றும் கடினமான பாடங்களைச் சீராகப் பிரித்துப் படிக்க வேண்டும்.

தினமும் குறிப்பிட்ட நேரத்தில் படிப்பதை வழக்கமாக்கிக் கொள்வதுடன், தொடர்ந்து பல மணி நேரம் படிக்காமல் இடையே ஐந்து அல்லது பத்து நிமிடங்கள் சிறு இடைவெளி எடுப்பது மூளையை எப்போதும் புத்துணர்ச்சியுடன் வைத்திருக்க உதவும்.

எழுதிப் பார்க்க வேண்டும்

பாடங்களை மனப்பாடம் செய்வதை விட, அதன் அடிப்படைக் கருத்துகளை ஆழமாகப் புரிந்து கொள்வதே நீண்ட காலம் நினைவில் நிற்க வழிவகுக்கும். படித்து முடித்ததும் முக்கியமான குறிப்புகள், சூத்திரங்கள் மற்றும் வரைபடங்களைச் சுருக்கமாகத் தனியே எழுதிப் பார்ப்பது நினைவாற்றலை பலப்படுத்தும். படித்த விஷயங்களை நண்பர்களுக்குச் சொல்லிக் கொடுப்பது மற்றும் வகுப்பறையில் ஆசிரியரிடம் தயங்காமல் சந்தேகங்களைக் கேட்டுத் தெளிவுபடுத்திக் கொள்வது, பாடத்தை நன்றாக புரிந்து கொள்ள உதவும்.

மாதிரித் தேர்வு

தொடர்ந்து, முந்தைய ஆண்டுகளின் வினாத்தாள்களை பார்ப்பது, தேர்வின் அமைப்பைப் புரிந்து கொள்ள உதவும். தேர்வு அறை போன்ற சூழலை வீட்டிலேயே உருவாக்கி, குறிப்பிட்ட நேரக் கட்டுப்பாட்டுடன் மாதிரித் தேர்வுகளை எழுதிப் பழக வேண்டும். இது நேர மேலாண்மையை வளர்க்கும். எந்தப் பகுதியில் கூடுதல் கவனம் செலுத்த வேண்டும் என்பதையும் தெளிவாகக் காட்டும். இதன் மூலம் உண்மையான தேர்வை எதிர்கொள்ளும் போது மாணவர்களுக்கு எழும் பயமும் நடுக்கமும் நன்றாக குறைய வாய்ப்புள்ளது.

உடல் நலமும் மன நலமும்

தேர்வில் நல்ல மதிப்பெண் பெற, உடல் நலமும் மன நலமும் அவசியம். தேர்வு நேரத்தில் இரவு முழுவதும் கண் விழித்துப் படிப்பது, அதிகப்படியான டீ அல்லது காபி குடிப்பது போன்றவை உடல் நலத்தைக் கெடுத்து கவனச்சிதறலை உண்டாக்கும். அதனால், தினமும் சத்தான உணவு, போதுமான அளவு தண்ணீர் மற்றும் குறைந்தது ஏழு முதல் எட்டு மணி நேரத் தூக்கம் மிக அவசியம். அதே போல, எளிய உடற்பயிற்சியும் ஆழ்ந்த மூச்சுப் பயிற்சியும் மன அழுத்தத்தைக் குறைக்க உதவும்.

ஒருமுறை சரிபார்க்க வேண்டும்

மற்றவர்களோடு நம்மை ஒப்பிட்டுப் பார்த்துத் தாழ்வு மனப்பான்மை கொள்வதைத் தவிர்க்க வேண்டும். சொந்த முயற்சியின் மீது முழு நம்பிக்கை வைக்க வேண்டும். தேர்வு நாளன்று பதற்றமின்றி உரிய நேரத்திற்கு முன்னதாகவே தேர்வு அறைக்குச் செல்ல வேண்டும். வினாத்தாளைப் பெற்றதும் அனைத்து வினாக்களையும் முழுமையாக வாசித்து விடையளிக்க வேண்டும். மேலும், விடைகளை, பிழையின்றி எழுதி முடித்துவிட்டு, மீதமுள்ள நேரத்தில் ஒருமுறை சரிபார்ப்பது தவறுகளைத் தவிர்க்க உதவும்.