ஜெத்தா: ஒற்றுமை, பண்பாடு மற்றும் சமூக உணர்வின் ஒளி விளக்காக திகழ்ந்த விழாவாக, ஜெத்தாவில் செயல்பட்டு வரும் பத்தனம்திட்டா மாவட்ட சங்கம் (PJS) தனது 17-வது ஆண்டு நிறைவை “அமிர்தோத்ஸவம்-2026” என்ற தலைப்பில் மிக விமர்சையாக கொண்டாடியது. வண்ணமயமான கலாச்சார நிகழ்ச்சிகள், இந்திய சமூகத்தின் உற்சாகமான பங்கேற்பு, பெருமையும் நினைவுகளும் நிரம்பிய ஒற்றுமை சூழல் ஆகியவை இந்நிகழ்வை சிறப்புமிக்க ஒன்றாக மாற்றின.

இந்திய துணைத் தூதரகத்தின் சமூக நலத் துணைக் கான்சல் கமலேஷ் குமார் மீனா விழாவைத் திறந்து வைத்து, PJS அமைப்பின் நீண்டகால தொண்டு சேவைகளையும் சமூகத்தில் கலை, விளையாட்டு மற்றும் கலாச்சார முன்னேற்றத்திற்காக மேற்கொண்டு வரும் சிறப்பான பங்களிப்புகளையும் பாராட்டினார்.

விழாவின் முக்கிய அம்சமாக அமைந்த மெகா இசை நிகழ்ச்சியில், கேரள பாடகர் சுமேஷ் தலைமையில் மெம்ஸ் மீ மற்றும் கலாபவன் ராஜேஷ் ஆகியோரின் மேடை நிகழ்ச்சிகள் பார்வையாளர்களை மெய்மறக்கச் செய்தன. உற்சாகமான இசை மற்றும் அதிரடி நிகழ்த்தல்கள் அரங்கம் எங்கும் பரவிய உற்சாகத்தை உருவாக்கி, ரசிகர்களையும் பாடலோடு இணைந்து பாடவும் நடனமாடவும் தூண்டின.

ஜெத்தாவில் கலாச்சார வளர்ச்சிக்கு வழங்கிய பங்களிப்புக்கள் கௌரவிக்கும் வகையில் வழங்கப்படும் “உல்லாஸ் நினைவு விருது” இந்த ஆண்டு பாடகி மும்தாஸ் அப்துல் ரஹ்மான் மற்றும் நிறுவன உறுப்பினர் மறைந்த ஷாஜி கோவிந்தனை நினைவுகூரும் வகையில் குலைல் பாலி கிளினிக் நிர்வாக இயக்குநர் அர்ஷாத் நௌஃபலுக்கு வழங்கப்பட்டது. மேலும், நீண்ட கால சேவையை மதிப்பளிக்கும் வகையில் அலி ராவுத்தருக்கு “PJS ஐகான் ஆஃப் தி இயர்” விருது வழங்கப்பட்டது. கல்வி மேம்பாட்டிற்கான அமைப்பின் அர்ப்பணிப்பை வெளிப்படுத்தும் விதமாக, 12-ஆம் வகுப்பில் உயர்ந்த மதிப்பெண் பெற்ற சித்ராவுக்கும் கல்வி விருது வழங்கப்பட்டது.

ஷரபுத்தீன் தலைமையிலான PJS பீட்ஸ் குழுவின் தொடக்க இசை நிகழ்ச்சி அரங்கத்தை உற்சாகக் களமாக மாற்றியது. தொடர்ந்து நடைபெற்ற பாரம்பரிய நடனங்கள் நமது கலாச்சாரத்தின் செழுமையையும் அழகையும் சிறப்பாக வெளிப்படுத்தின.

நிகழ்ச்சி வெற்றிகரமாக நடத்த பங்களித்த பீனோம் அகாடமி, நடன பயிற்சியாளர் பிந்து, குழந்தைகள் நடன பயிற்சியாளர் தீபிகா சந்தோஷ் மற்றும் தொழில்நுட்ப ஆதரவாளர்கள் நஜீப், சாஜு ஆகியோர் கௌரவிக்கப்பட்டனர்.

பொதுச் செயலாளர் என்.ஐ. ஜோசப் வரவேற்புரை வழங்க, பொருளாளர் ஜெயன் நன்றியுரை வழங்கினார். நிகழ்ச்சி கே. ராஜு மற்றும் பெட்சி செபாஸ்டியன் திறம்பட தொகுத்து வழங்கினர்.

மகிழ்ச்சி, ஒற்றுமை மற்றும் இனிய நினைவுகளை விதைத்த இவ்விழா, சமூகப் பயணத்தில் மறக்க முடியாத பெருமைமிக்க மைல்கல்லாக உயர்ந்து நிறைவடைந்தது.

- ஜெத்தாவிலிருந்து நமது செய்தியாளர் M Siraj