கடந்த ஒராண்டாக எனக்கு வறட்டு இருமல் இருக்கிறது. எப்போது எல்லாம் நான் மன அழுத்தம் அடைகிறேனோ, அந்த சமயங்களில், இந்த வறட்டு இருமல் அதிகமாக உள்ளது. இதற்காக சில ஆங்கில மருந்துகளையும் சமயங்களில் ஆயுர்வேத மருந்துகளையும் சாப்பிடுகிறேன். ஆனாலும் இது தொடர்ந்து கொண்டுதான் இருக்கிறது. மனப்பதற்றத்திற்கும் இருமலுக்கும் தொடர்பு இருக்கிறதா?

அமுதா, திருச்சி

வறட்டு இருமலுக்கும், மன அழுத்தத்திற்கும் தொடர்பு இருப்பதாக, இதுவரை எந்த மருத்துவ ஆய்வும் உறுதி செய்யவில்லை. ஆனால், ஸ்ட்ரெஸ் அல்லது டென்ஷன் வரும்போது, காபி, டீ அல்லது பழச்சாறு, சமயங்களில் சிகரெட் போன்ற பழக்கத்தால் மன அழுத்தத்தில் இருந்தது, தற்காலிக தீர்வு தருவதாக நம்பி, நீங்கள் பயன்படுத்தினால், இதில் ஏதாவது ஒன்று, உங்களின் வறட்டு இருமலை அதிகப்படுத்தலாம். காபி அல்லது பழச்சாறில் உள்ள சர்க்கரை இருமலை அதிகப்படுத்தலாம். இருமலுக்கு டாக்டர் எழுதித் தரும், எந்த மருந்தும் குறிப்பிட்ட பிரச்னைக்கு தீர்வு தரும். ஆனால் உங்கள் விஷயத்தை பொறுத்தவரை, 'சைக்கோ சோமாடிக்' எனப்படும் மனப் பிரச்னையினால் இருமல் அதிகமாக இருப்பதாக தோன்றுகிறது. அதாவது, இதனால் தான் எனக்கு வறட்டு இருமல் இருக்கிறதோ என்று, உள் மனதில் பயம், நம்பிக்கை உள்ளது. ஒரு விஷயத்தைப் தெரிந்து கொள்ளுங்கள், சுவாசப் பாதையில் ஏற்படும் தொற்றை தானே சரி செய்யும் தன்மை, நம் உடலுக்கு உண்டு. இருமல் அதற்கான ஒரு வழிதான்.