* நம்பிக்கையுடனும், நல்ல மாற்றம் வரும் என்ற எதிர்பார்ப்புடனும் வாழ்க்கையில் அடியெடுத்து வைக்கிறோம். நமது வளர்ச்சி பணத்தின் அடிப்படையில் ஆனதாக மட்டும் இருந்துவிடக்கூடாது. நல்ல குணமும், பண்பும் உள்ளத்தில் மாற்றத்தை நிகழ்த்த வேண்டும். இதற்கு மனதிலுள்ள போராட்டமும், வேண்டாத குணங்களும் நீங்க வேண்டும்.* வளமையும், வளர்ச்சியும் கொண்ட உலகை உருவாக்குவது மட்டும் நமது நோக்கமாக இருக்கக்கூடாது. சமாதானம், ஒத்துழைப்பு, ஒற்றுமை, உயிரினங்களின் மீது கருணை என்ற குணங்களையும் கொண்டதாக இருக்க வேண்டும். இதற்கு தர்மநெறியிலும், பண்பாட்டிலும், ஆன்மிகத்திலும் முன்னேற்றமடைய வேண்டும்.* குருவாயூருக்கும், சபரிமலைக்கும் சென்றால் தான் இறைவனை காணமுடியும் என எண்ணக்கூடாது. இறைவன் ஒரு கோயிலின் நான்கு சுவர்களுக்குள் மட்டும் இருக்கிறார் என்று கருதுவதற்கில்லை. அவர் எங்கும் நிறைந்தவர். நாம் எங்கிருந்தாலும், அனைத்து உயிர்களிலும் அவரைக் கண்டு அன்புடன் பணி செய்வதே உண்மையான சேவை.- சாய்பாபா