பாலகிருஷ்ணாவுக்கு வில்லனாக களம் இறங்கிய அர்ஜுன் ராம்பால்
ADDED : 934 days ago
இந்த வருட துவக்கத்திலேயே தெலுங்கு திரையுலகில் வெளியான வீர சிம்ஹா ரெட்டி என்கிற படத்தின் மூலம் தனது வெற்றியை அழுத்தமாக பதிய வைத்து விட்டார் நடிகர் பாலகிருஷ்ணா. இந்த படத்தை கோபிசந்த் மாலினேனி என்பவர் இயக்கி இருந்தார். இதையடுத்து பாலகிருஷ்ணா நடிக்கும் இன்னும் பெயரிடப்படாத அவரது 108 ஆவது படத்தை இயக்குனர் அனில் ரவிபுடி என்பவர் இயக்குகிறார்.
ஏற்கனவே விவேக் ஓபராய், சைப் அலிகான் என தொடர்ந்து பாலிவுட்டில் இருந்து பிரபலமான நடிகர்களை அழைத்து வந்து தென்னிந்திய படங்களில் வில்லனாக்கும் வரிசையில் இந்த படத்தின் மூலம் பாலிவுட் நடிகர் அர்ஜுன் ராம்பால் வில்லனாக அறிமுகமாகிறார்.
இதுகுறித்த அதிகாரப்பூர்வமான தகவலை தயாரிப்பு நிறுவனம் வெளியிட்டுள்ளது. அது மட்டுமல்ல, நடிகர் அர்ஜுன் ராம்பாலும் தன் பங்கிற்கு, முதன்முதலாக தெலுங்கில் தான் அடி எடுத்து வைக்கும் செய்தியை மகிழ்ச்சியுடன் பகிர்ந்து கொண்டுள்ளார்.