'தி எலிபெண்ட் விஸ்பரர்ஸ்' இயக்குனருக்கும் இங்கிலாந்து மன்னர் விருது

இங்கிலாந்து ராணி கமிலாவின் சகோதரரும், மறைந்த வன பாதுகாவலருமான மார்க் ஷண்டால் உருவாக்கப்பட்ட 'எலிபெண்ட் பேமிலி' என்ற சர்வதேச தன்னார்வ தொண்டு நிறுவனம் ஆசிய காடுகளில் யானைகள் அழிந்துவிடாமல் பாதுகாப்பதற்கான முயற்சிகளை மேற்கொண்டு வருகிறது. இந்த நிறுவனம் ஆசிய காடுகளில் வனவிலங்குகள் மற்றும் காடுகளை பாதுகாப்பதில் சிறந்த பங்களிப்பை தருபவர்களுக்கு விருதுகளை வழங்கி கவுரவித்து வருகிறது.

அந்த வகையில் ஆஸ்கர் விருது பெற்ற 'தி எலிபெண்ட் விஸ்பரர்ஸ்' என்ற ஆவணப்படத்தை இயக்கிய நீலகிரி மாவட்டத்தை சேர்ந்த பெண் இயக்குனரான கார்த்திகி கொன்சால்வசுக்கு இங்கிலாந்து மன்னர் விருது வழங்கப்பட்டது. இங்கிலாந்து அரண்மனையில் நடந்த விழாவில் மன்னர் 3ம் சார்லஸ் மற்றும் ராணி கமிலா இந்த விருதை வழங்கினார்கள். மனிதர்களுக்கும் யானைகளுக்கும் இடையே உள்ள ஆழமான அன்பை சொன்னதற்காக இந்த படத்திற்கு ஆஸ்கர் விருது கிடைத்தது.