‛ஏழு கடல் ஏழு மலை' : சர்வதேச திரைப்பட விழாவில் ராம் படம்

வி ஹவுஸ் புரொடக்ஷன்ஸ் சார்பில் சுரேஷ் காமாட்சி தயாரித்துள்ள படம் 'ஏழு கடல் ஏழு மலை'. கற்றது தமிழ், தரமணி, தங்க மீன்கள், பேரன்பு உள்ளிட்ட கவனிக்கத்தக்க படங்களை இயக்கிய ராம் இயக்கி உள்ளார். சூரி, அஞ்சலி, நிவின் பாலி நடித்துள்ளனர். யுவன் சங்கர் ராஜா இசையமைத்துள்ள இந்தப் படத்திற்கு ஏகாம்பரம் ஒளிப்பதிவு செய்துள்ளார். இந்த படம் 53 வது ரோட்டர்டாம் சர்வதேச திரைப்பட விழாவின் 'பிக் ஸ்க்ரீன் போட்டிப் பிரிவில்' திரையிட தேர்வாகி இருக்கிறது. வருகிற 2024 ஜனவரி 25 முதல் பிப்ரவரி 4 வரை இந்த திரைப்பட விழா நடக்கிறது.

இதுகுறித்து தயாரிப்பாளர் சுரேஷ் காமாட்சி கூறும்போது, ‛‛சர்வதேச அளவில் முதல் முறையாக சிறப்புக்குரிய ஒரு விருதிற்கான தேர்வில் எமது நிறுவனத்தின் படைப்பை உலக அரங்கில் கொண்டு நிறுத்தியுள்ள எங்கள் இயக்குநர் ராமிற்கு முதல் நன்றி. மேலும் படத்தில் நடித்த நிவின்பாலி, சூரி, அஞ்சலி உள்ளிட்ட நடிகர்கள், தொழில்நுட்ப கலைஞர்கள் மற்றும் ஒட்டுமொத்த கலைஞர்களுக்கும் நன்றி” என்றார்.