ஹிந்தியில் நேரடியாக டிவியில் ஒளிபரப்பாகும் ‛ரங்கஸ்தலம்'

கடந்த 2018ல் தெலுங்கில் ராம்சரண், சமந்தா இணைந்து நடித்த ரங்கஸ்தலம் என்கிற படம் வெளியானது. புஷ்பா படத்திற்கு முன்பாக இயக்குனர் சுகுமார் இந்த படத்தை இயக்கியிருந்தார். தனது அண்ணனை கொன்றவர்களை தம்பி பழிவாங்கும் கதை. அதை கொஞ்சம் புதுவிதமாக சொல்லி இருந்தார் இயக்குனர் சுகுமார். குறிப்பாக இந்த படத்தின் கிளைமாக்ஸ் காட்சி மிகப் பெரிய வரவேற்பு பெற்றது. படமும் வெற்றி படமாக அமைந்தது.

இந்தப்படம் வெளியாகி ஏழு வருடங்கள் ஆன நிலையில் தற்போது அப்படியே ஹிந்தியில் டப் செய்யப்பட்டு வெளியாக இருக்கிறது. அதே சமயம் நேரடியாக திரையரங்குகளுக்கு வராமல் ஹிந்தியில் உள்ள பிரபல தொலைக்காட்சி ஒன்றில வரும் ஆகஸ்ட் 24ம் தேதி நேரடியாக ஒளிபரப்பாக இருக்கிறது. ரங்கஸ்தலம், ஆர்ஆர்ஆர் படங்களை தொடர்ந்து ராம்சரணுக்கும், புஷ்பா படத்தின் வெற்றியை தொடர்ந்து சுகுமாருக்கும், பேமிலிமேன் வெப் சீரிஸ் மூலம் சமந்தாவுக்கும் சமீபகாலமாக பாலிவுட்டில் மிகப்பெரிய அறிமுகம் இருப்பதால் இத்தனை வருடம் கழித்து இந்த படம் ஹிந்தியில் டப்பிங் செய்யப்பட்டு வெளியாக இருக்கிறது.