பிப்ரவரி 2026 : வெளியான 22 படங்களில் எத்தனை வெற்றி?

2026ம் ஆண்டு ஆரம்பித்து இரண்டு மாதங்கள் வேக வேகமாக ஓடிப் போய்விட்டது. முதல் மாதமான ஜனவரி மாதத்தில் விஜய்யின் கடைசி படமான 'ஜனநாயகன்' வெளியாகும் என்று எதிர்பார்க்கப்பட்டு, இதுவரையில் ஏமாற்றமே மிஞ்சி வருகிறது.

ஜனவரி மாதத்தில் தியேட்டர்களில் வெளியான 22 படங்களில் 'தலைவர் தம்பி தலைமையில்' படம் மட்டும்தான் அனைவருக்கும் லாபத்தைக் கொடுத்த ஒரு படமாக இருந்தது. 'பராசக்தி' படம் 100 கோடி வசூலைக் கடந்தது என்று அறிவிக்கப்பட்டாலும் எதிர்பார்த்தபடி லாபம் இல்லை என்பதுதான் பாக்ஸ் ஆபீஸ் தகவல்.

பிப்ரவரி மாதத்திலாவது 'ஜனநாயகன்' தணிக்கை விவகாரம் முடிந்து படம் வெளியாகும் என்று எதிர்பார்க்கப்பட்டு, அது மீண்டும் ஏமாற்றத்தைத் தந்தது. இப்போதைய சூழ்நிலையில் தமிழக சட்டமன்றத் தேர்தல் வெளியாகும் வரை இப்படம் வர வாய்ப்பில்லை என்றுதான் சொல்கிறார்கள்.

பிப்ரவரி மாதத்தில் எந்த ஒரு பெரிய படங்களும் வெளியாக வாய்ப்பில்லை என்றுதான் மாதத்தின் துவக்கத்திலேயே முடிவானது. அதற்கேற்றபடிதான் கடந்த மாதத்தில் படங்கள் வெளிவந்தன.

பிப்ரவரி 6ம் தேதி வெளியான படங்களில் 'வித் லவ்' படம் மட்டுமே வரவேற்பைப் பெற்று வெற்றிகரமாக ஓடியது. அப்படம் 25 கோடி வசூலைக் கடந்திருக்கும் என்கிறார்கள். கடந்த வருடத்தின் முக்கிய வெற்றிப் படமான 'டூரிஸ்ட் பேமிலி' படத்தை இயக்கிய அபிஷன் ஜீவிந்த் இப்படத்தில் நாயகனாக அறிமுகமாகி நடிப்பிலும் வெற்றியைப் பதித்துள்ளார்.

பிப்ரவரி 13ம் தேதி வெளியான படங்களில் சசிகுமார் நடித்து வெளிவந்த 'மை லார்ட்' படத்திற்கு ஓரளவு நல்ல விமர்சனங்களும், சுமாரான வரவேற்பும் கிடைத்தது. படம் வெற்றி பெற்றதாக நன்றி தெரிவிக்கும் சந்திப்பையும் படக்குழு நடத்தினார்கள். படத்தின் வெளியீட்டிற்குப் பிறகு ஓடிடி நிறுவனம் படத்தை வாங்கியதும் அதற்குக் காரணமாக அமைந்தது. 'ஏ' படமாக வெளிவந்த 'ஸ்வீட்டி நாட்டி கிரேஸி' படம் சில தியேட்டர்களில் ஓரளவு வசூலைப் பெற்றதாகத் தகவல்.

பிப்ரவரி 20ம் தேதி வெளியான படங்களில் ஒரு படம் கூட ரசிகர்களின் வரவேற்பைப் பெறவில்லை.

பிப்ரவரி 27ல் வெளியான படங்களில் ராதிகா முதன்மைக் கதாபாத்திரத்தில் நடித்த 'தாய் கிழவி' படத்திற்கு நல்ல விமர்சனங்களும் குறிப்பிடத்தக்க வசூலும் கிடைத்து வருகிறது. வரும் நாட்களில்தான் இந்தப் படத்திற்கான வசூல் எப்படி இருக்கப் போகிறது என்பது தெரிய வரும்.

பிப்ரவரி மாதம் ஓடிடி தளத்தில் நேரடியாக வெளியான படமாக ஜிவி பிரகாஷ்குமார் நடித்த 'லக்கி த சூப்பர்ஸ்டார்' படம் பிப்ரவரி 20ம் தேதி வெளியானது.

மொத்தமான லாபம் என்பதில் ஜனவரி மாதத்தில் வெளியான படங்களில் 'தலைவர் தம்பி தலைமையில்' படம் இருந்தது. பிப்ரவரி மாதத்தில் அப்படியானதொரு படமாக 'வித் லவ்' படம் அமைந்தது.

வழக்கம் போல ஜனவரி மற்றும் பிப்ரவரி மாதங்களில் எந்த ஒரு வெள்ளிக்கிழமையிலும் இடைவெளி இல்லாமல் நான்கைந்து படங்கள் வெளிவருவது வழக்கமாக உள்ளது.

நாளை மார்ச் 2ம் தேதி முதல் மாநில பாடத் திட்டத்தின் 12ம் வகுப்புகளுக்கான முழு ஆண்டுத் தேர்வுகள் ஆரம்பமாகிறது. அடுத்தடுத்து 10ம் வகுப்பு மற்றும் இதர வகுப்புகளுக்கான தேர்வுகள் ஆரம்பமாக உள்ளன.

ஏப்ரல் மாதக் கடைசி வரையிலும் தேர்வுகள் நடைபெற உள்ளது. அதனால் அடுத்த இரண்டு மாதக் காலங்களுக்கு தியேட்டர்கள் பக்கம் ரசிகர்கள் வருவது குறைவதற்கான வாய்ப்புகள் அதிகம். தேர்வுகள் முடிவடையும் முன்னரே தேர்தல் பரபரப்பும் அதிகமாகும். அதற்குள் ஐபிஎல் போட்டிகளும் ஆரம்பமாகிவிடும். இத்தனையும் கடந்து புதிய படங்கள் தாக்குப் பிடிக்க வேண்டும். இருந்தாலும் தொடர்ந்து சில பல சிறிய பட்ஜெட் படங்கள் அவர்களது வெளியீட்டு அறிவிப்புகளை வெளியிட்டுக் கொண்டுதான் இருக்கிறார்கள்.

பிப்ரவரி 2026 வெளியான படங்கள்…

பிப்ரவரி 6

கில்லி மாப்பிள்ளை, காதல் கதை சொல்லவா, பாடும் குயிலே, ரெட் லேபிள், வித் லவ், யோகிடா

பிப்ரவரி 13

ட்ரீம் கேர்ள், கா, மை லார்ட், மைலாஞ்சி, பூக்கி, ஸ்வீட்டி நாட்டி கிரேஸி

பிப்ரவரி 20

அறிவான், லவ் சப்ஸ்க்ரைப் ஷேர், எம்ஜி 24, மை டியர் டாலி, சிவ சம்போ

பிப்ரவரி 27

ஆழி, ஏ படம், போர்த் புளோர், தாய் கிழவி