ஹைதராபாத் 'ஷிப்ட்' ஆன லோகேஷ் கனகராஜ் 'டீம்'

ரஜினிகாந்த் நடித்த 'கூலி' படத்தை இயக்கியதற்குப் பிறகு கமல், ரஜினி இணைந்து நடிக்கும் படத்தை லோகேஷ் கனகராஜ் இயக்கப் போவதாக ஒரு தகவல் வெளியானது. ஆனால், தான் சொன்ன ஆக்ஷன் கதையை அவர்கள் வேண்டாமென்று சொன்னதாகவும், ஒரு 'லைட்டான' கதையை அவர்கள் விரும்பியதாகவும் தெரிவித்திருந்தார்.

அதையடுத்து அவரது அடுத்த படத்திற்கு வேறு ஹீரோக்களுடன் பேச ஆரம்பித்தார். தெலுங்கு நடிகர் அல்லு அர்ஜுனுக்கு லோகேஷ் சொன்ன கதை பிடித்துப் போக உடனடியாக படம் பற்றிய அதிகாரப்பூர்வ அறிவிப்பை வெளியிட்டார்கள். தெலுங்கில் முன்னணி தயாரிப்பு நிறுவனமான மைத்ரி மூவி மேக்கர்ஸ் நிறுவனம் படத்தைத் தயாரிக்கிறது. இந்தப் படம் லோகேஷ் இயக்கத்தில் சூர்யா நடிக்க, உருவாவதாக இருந்த 'இரும்புக் கை மாயாவி' படம்தான் என்றும் ஒரு பேச்சு எழுந்தது.

இந்நிலையில் அந்தப் படத்திற்காக லோகேஷ் கனகராஜ் மற்றும் குழுவினர் சமீபத்தில் ஹைதராபாத்திற்கு மொத்தமாக 'ஷிப்ட்' ஆகியுள்ளனர். இந்த வருடக் கடைசியில் படப்பிடிப்பு ஆரம்பமாகும் எனத் தெரிகிறது. முன் தயாரிப்புப் பணிகளுக்காக இப்போதே அங்கு போய்விட்டார்கள். அடுத்த ஆண்டு படம் வெளியாகும் வரை அனைவரும் அங்குதான் இருப்பார்களாம். 2028ம் வருடம்தான் மீண்டும் சென்னை பக்கம் வருவார்களாம்.