ராமர் கோவில் - பவன் கல்யாண் தயாரிப்பாளர்கள் நன்கொடை

தெலுங்குத் திரையுலகின் முன்னணி நடிகர்களில் ஒருவரான பவன் கல்யாண், அயோத்தியில் ராமர் கோயில் கட்ட 30 லட்ச ரூபாயை நன்கொடையாக சமீபத்தில் வழங்கி இருந்தார். அவரது நன்கொடையால் உந்தப்பட்ட பவன் கல்யாணை வைத்து படங்களைத் தயாரித்த தயாரிப்பாளர்கள், தற்போது தயாரித்துக் கொண்டிருக்கும் சிலர் ஒன்றாக 54 லட்சத்து 51 ஆயிரம் ரூபாயை ராமர் கோயில் கட்ட நன்கொடையாக வழங்கியுள்ளார்கள்.

தயாரிப்பாளர்கள் ஏஎம் ரத்னம், ராதாகிருஷ்ணா, தில் ராஜு, நவீன் எல்நேனி, பண்டலா கணேஷ் ஆகியோர் அந்தப் பணத்தை பவன் கல்யாண் முன்னிலையில் வழங்கினார்கள். இத்தகவலை பவன் கல்யாணின் ஜனசேனா கட்சியினர் வெளியிட்டுள்ளார்கள்.

ஆந்திர மாநிலத்தில் இந்து மக்களுக்காக அதிகம் குரல் கொடுக்கக் கூடிய நடிகர்களில் ஒருவராக பவன் கல்யாண் இருக்கிறார் என்பது குறிப்பிடத்தக்கது. அயோத்தியில் ராமர் கோயில் கட்ட அவர் நன்கொடை அளித்ததைத் தொடர்ந்து பலரும் அது போல நன்கொடை வழங்கி வருகிறார்கள்.