தெலுங்கில் ரீமேக்காகும் 'கர்ணன்'

மாரி செல்வராஜ் இயக்கத்தில் தனுஷ், லால், ரஜிஷா விஜயன் மற்றும் பலர் நடித்து இந்த மாதம் 9ம் தேதி வெளியான படம் 'கர்ணன்'. விமர்சன ரீதியாகவும், வியாபார ரீதியாகவும் நல்ல வரவேற்பைப் பெற்ற படமாக அமைந்தது.

இப்படத்தை தெலுங்கு ரீமேக் உரிமையை பிரபல தெலுங்குப் படத் தயாரிப்பாளர் பெல்லம்கொன்டா சுரேஷ் வாங்கியுள்ளாராம். அவரது மகன் பெல்லம்கொன்டா சீனிவாஸ் கதாநாயகனாக நடிக்க இப்படத்தைத் தயாரிக்கப் போகிறார்.

படத்தின் ஆரம்பக்கட்ட வேலைகள் ஆரம்பமாகிவிட்டதாகவும், விரைவில் படத்தின் இயக்குனர் மற்ற கலைஞர்களைத் தேர்வு செய்ய உள்ளார்களாம்.

பெல்லம்கொன்டா சீனிவாஸ் இதுவரை கமர்ஷியல் படங்களில்தான் நடித்திருக்கிறார். இம்மாதிரியான வித்தியாசமான வேடங்களில் நடித்ததில்லை. இப்படிப்பட்ட கதாபாத்திரங்களில் தனது மகன் நடித்தால் நன்றாக இருக்கும் என பெரிய விலை கொடுத்து இப்படத்தின் ரீமேக் உரிமையை சுரேஷ் வாங்கியுள்ளதாக டோலிவுட்டில் தெரிவிக்கிறார்கள்.

இவர் தயாரிக்கும் படங்களில் முன்னணி கதாநாயகிகளைத்தான் தன் மகனுக்கு ஜோடியாக நடிக்க வைப்பார். இப்படத்திலும் அப்படிப்பட்ட ஒருவரைத்தான் தேர்ந்தெடுப்பார் என்கிறார்கள்.