கிருஷ்ணகிரி விண்ணரசி ஆலய தேர்த்திருவிழா!

கிருஷ்ணகிரி: கிருஷ்ணகிரி அடுத்த கந்திகுப்பம் தூய விண்ணரசி அன்னை ஆலய தேர்திருவிழாவில், ஆயிரக்கணக்கானோர் கலந்து கொண்டனர்.கிருஷ்ணகிரி அடுத்த கந்திகுப்பத்தில் அமைந்துள்ளது, தூய விண்ணரசி அன்னை ஆலயம். இந்த ஆலயத்தின் தேர்திருவிழா, கடந்த, 10ம் தேதி கொடியேற்றத்துடன் துவங்கியது. இதனையடுத்து, ஆலயத்தில் கடந்த, 16ம் தேதி வரை, நவநாள் திருப்பலி, சிறப்பு மறையுரை, குணமளிக்கும் ஜெப வழிபாடு, குணமளிக்கும் அருங்கொடை, நற்கருணை ஆசிர் போன்ற நிகழ்வுகள் நடந்தது. விழாவில், முக்கிய நிகழ்வான தேர்பவனி நேற்று முன்தினம் இரவு வெகுவிமரிசையாக நடந்தது. மலர்களால் அலங்கரிக்கப்பட்ட தேரில், விண்ணரசி திருவீதி உலா வந்தார். இந்நிகழ்ச்சியை காண கிருஷ்ணகிரி மாவட்டத்தை சேர்ந்த ஆயிரக்கணக்கானோர் கந்திகுப்பத்தில் குவிந்தனர். விழாவுக்கு, தர்மபுரி மறை மாவட்ட ஆயர் லாரன்ஸ் பயஸ் தலைமை வகித்தார். ஏற்பாடுகளை, கந்திகுப்பம் பங்கு தந்தை ஆரோக்கிய ஜேம்ஸ் தலைமையில் விழாக்குழுவினர் செய்திருந்தனர்.