ஃபண்டமென்டல் அனாலிசிஸ் : சவாலை சமாளிக்கும் டாக்டர் ரெட்டீஸ் லேப்

இ ந்தியாவைச் சேர்ந்த மிகப்பெரிய பார்மசூட்டிக்கல் நிறுவனங்களுள் ஒன்று, டாக்டர் ரெட்டீஸ் லேபாரட்டரீஸ். வட அமெரிக்கா போன்ற வளர்ச்சியடைந்த சந்தைகளில் ஜெனரிக் மருந்துகள், இந்தியா போன்ற வளர்ந்து வரும் சந்தைகளுக்கு பிராண்டட் மருந்துகள், பயோசிமிலர்ஸ், பயோலாஜிக்ஸ் மற்றும் நுகர்வோர் பயன்பாட்டுக்கான மருந்துகள் என, பல்வேறு வணிக பிரிவுகளில் டாக்டர் ரெட்டீஸ் நிறுவனம் இயங்கி வருகிறது.

உலகில் பல்வேறு நாடுகளில் தங்களது மருந்துகளை டாக்டர் ரெட்டீஸ் விற்பனை செய்து வருகிறது. இந்நிறுவனத்தின் வருவாயில் வட அமெரிக்கா மிகப்பெரிய பங்களிப்பை அளித்து வந்தாலும், இந்தியாவும், ஐரோப்பிய நாடுகளும் நிறுவனத்துக்கு முக்கிய பங்களிப்பாளராக மாறி வருகின்றன.

முக்கிய நாடுகள்

அமெரிக்கா டாக்டர் ரெட்டீஸ் நிறுவனத்துக்கு அமெரிக்கா தற்போதும் மிக முக்கிய சந்தையாக இருந்து வருகிறது. புற்றுநோய்க்கான 'ரேவ்லிமிட்' போன்ற மருந்துகள் மற்றும் சிக்கலான ஜெனரிக் மருந்துகள் வாயிலாகவே நிறுவனத்துக்கு அமெரிக்காவில் அதிக வருவாய் கிடைத்து வந்தது. தற்போது ரேவ்லிமிட் மருந்தின் வருவாய் குறைந்து வருவதால், தனது அமெரிக்க சந்தையை மீண்டும் வலுப்படுத்த, செமாக்லுடைடு மற்றும் சிக்கலான ஊசி மருந்துகள் போன்றவற்றில் கவனம் செலுத்தி வருகிறது. இந்தியா இந்தியாவில், செரிமான மண்டல மருத்துவம், வலி நிவாரணம், இதய சிகிச்சை மற்றும் நீரிழிவு நோய் பராமரிப்பு போன்ற பிரிவுகளில் முன்னிலையில் இருப்பதோடு வலுவான பிராண்டட் மருந்து வணிகத்தையும் கொண்டுள்ளது. இந்திய மருந்து சந்தையின் பொதுவான வளர்ச்சியை விட தொடர்ச்சியாக, அதிவேக வளர்ச்சியில் கவனம் செலுத்தி வருகிறது. ஐரோப்பா நுகர்வோர் ஆரோக்கியம் மற்றும் பயோசிமிலர்ஸ் பிரிவுகளில் நிறுவனத்துக்கு, ஐரோப்பா மிக முக்கிய சந்தையாக இருந்து வருகிறது. 'நிகோடினல்' போன்ற பிராண்டட் மருந்துகள் ஒரு நிலையான வருவாயை வழங்குகிறது. பயோசிமிலர்ஸ் பிரிவில் டாக்டர் ரெட்டீஸ் நிறுவனத்தின் மருந்து அங்கீகரிக்கப்பட்டுள்ளது. இதன் வாயிலாக, உயிரியல் மருந்து சந்தையில் தனது தளத்தை நிறுவனம் அமைத்துள்ளது. இதுமட்டுமன்றி, 'ரிட்டுக்சிமேப்' உள்ளிட்ட பிற பயோசிமிலர் மருந்துகள் ஐரோப்பிய ஒழுங்குமுறை ஒப்புதலுக்காக உள்ளன. இது, ஒரே ஒரு தயாரிப்பை மட்டும் நம்பியிருக்காமல், பன்முகப்படுத்தப்பட்ட பயோசிமிலர் வணிகத்தை உருவாக்குவதற்கு நிறுவனம் திட்ட மிட்டுள்ளதை காட்டுகிறது.

வருவாய், விற்பனை

டாக்டர் ரெட்டீஸ் நிறுவனம் வட அமெரிக்காவில், 'ரேவ்லிமிட்' என்ற உயர் மதிப்புள்ள புற்றுநோய் மருந்தின் முக்கிய ஜெனரிக் வினியோகஸ்தராக இருந்து வந்தது. ஆனால், தற்போது இந்த மருந்தின் காப்புரிமை காலம் முடிந்து, அதிக போட்டி நிறைந்த நிலைக்கு சென்றுள்ளதால், இதன் விலை மற்றும் விற்பனை அளவு கணிசமாக குறைந்தது. இதன் காரணமாக இந்நிறுவனத்தின் அமெரிக்க வருவாயும், லாப வரம்பும் பாதிக்கப்பட்டுள்ளது. வட அமெரிக்காவில் இந்நிறுவனத்தின் மொத்த வட்டி மற்றும் வரிக்கு முந்தைய லாபத்தில், 40 - 50 சதவீதம் வரை இந்த ஒரு மருந்தே பங்களித்து வந்ததால், இதன் வீழ்ச்சி மிகப்பெரிய தாக்கத்தை ஏற்படுத்தும். சுருக்கமாக சொன்னால், ரேவ்லிமிட் ஒரு மிகப்பெரிய லாபகரமான தயாரிப்பாக இருந்ததால், அதன் வருவாய் இழப்பை ஈடுகட்ட புதிய தயாரிப்புகளோ அல்லது பிற வணிக வளர்ச்சிகளோ உடனடியாக இல்லாதபட்சத்தில், அது நிறுவனத்தின் ஒட்டுமொத்த லாபத்தில் பெரும் சரிவை உண்டாக்கும்.

பெரிய வாய்ப்பு

செமாக்லுடைடு (ஜி.எல்.பி.,-1 ஜெனரிக்ஸ்): வெகோவி, ஓசெம்பிக் மருந்துகளின் முக்கிய அங்கமான, 'செமாக்ளுடைடு' மருந்தின் ஜெனரிக் பதிப்பை, காப்புரிமை அனுமதியை பொறுத்து நடப்பாண்டில், 87 வளர்ந்து வரும் நாடுகளில் அறிமுகப்படுத்த போவதாக டாக்டர் ரெட்டீஸ் நிறுவனம் அறிவித்துள்ளது. தற்போது உலகளவில் ஜி.எல்.பி., 1 வகை மருந்துகளுக்கான தேவை வேகமாக அதிகரித்து வருவதால், இதன் வெற்றிகரமான அறிமுகம் ரெவ்லிமிட் மருந்தின் இழப்பை ஓரளவு ஈடுகட்டும் என்று எதிர்பார்க்கப்படுகிறது. குறிப்பாக இந்தியா, பிரேசில் மற்றும் கனடா போன்ற நாடுகளில் காப்புரிமை காலம் விரைவில் முடிவுக்கு வருவதால், அந்தச் சந்தைகளில் இது பெரிய வாய்ப்பாக அமையும். பயோசிமிலர்ஸ் (அபாடாசெப்ட் மற்றும் பிற மருந்துகள்): நிறுவனம் தனது பயோசிமிலர் தயாரிப்பு வரிசையையும் தீவிரமாக மேம்படுத்தி வருகிறது. இதில் முக்கியமாக, முடக்கு வாதத்துக்கு பயன்படுத்தப்படும், 'அபாடாசெப்ட்' பயோசிமிலர் தற்போது மூன்றாம் கட்ட சோதனையில் உள்ளது. ஆய்வுகள் மற்றும் ஒழுங்குமுறை ஒப்புதல்கள் திட்டமிட்டபடி நடந்தால், 2027 -- 2028ம் ஆண்டு காலகட்டத்தில் சந்தைக்கு வர வாய்ப்புள்ளது. இத்தகைய பயோசிமிலர் மருந்துகள் காலப்போக்கில் நிறுவனத்துக்கு நிலையான லாபத்தை வழங்கக்கூடியவை. என்ஆர்டி (நிகோடின் ரீபிளேஸ்மென்ட் தெரபி): 'நிகோடினெல்' எனும் நிகோடின் மாற்று சிகிச்சை வணிகத்தை கையகப்படுத்தியுள்ளது. நிலையற்ற அமெரிக்க ஜெனரிக் சந்தையை தாண்டி, தொடர்ச்சியான வருவாயை ஈட்டும் நோக்கில் இந்த நுகர்வோர் பயன்பாட்டு மருந்து வணிகத்தை நிறுவனம் முன்னிலைப்படுத்துகிறது. நிறுவனம் தனது ஸ்பெஷாலிட்டி மற்றும் பயோசிமிலர் பிரிவுகளை கட்டமைக்கும் வரை, இது ஒரு சீரான பணப்புழக்கத்தை வழங்க உதவும். இந்தியா, இதர சந்தைகள்: இந்தியாவிலும், பிற வளர்ந்து வரும் சந்தைகளிலும் தனது பிராண்டட் மருந்து வணிகத்தை நிறுவனம் தீவிரமாக வளர்த்து வருகிறது. வட அமெரிக்க சந்தை நெருக்கடியை சந்தித்தபோது, இந்தியா மற்றும் ஐரோப்பிய சந்தைகள் வலுவான வளர்ச்சியை பதிவு செய்துள்ளன. நாள்பட்ட நோய்களுக்கான உயர் லாப வரம்பு கொண்ட மருந்துகள் வாயிலாக இந்திய வணிகத்தை விரிவுபடுத்துவது, அமெரிக்க சந்தையின் பலவீனத்தை ஈடுகட்டவும், புதிய ஆராய்ச்சி மற்றும் மேம்பாட்டிற்கு தேவையான நிதியை வழங்கவும் உதவும். பொறுப்பு துறப்பு இந்த அறிக்கை முதலீட்டு பரிந்துரை அல்ல. நாங்களோ எங்கள் வாடிக்கையாளர்களோ இந்த பங்குகளை வைத்திருக்கலாம், வாங்கிக்கொண்டு இருக்கலாம் அல்லது விற்றுக்கொண்டு இருக்கலாம் என்பதை உங்கள் கவனத்தில் வைத்துக்கொள்ளுங்கள்.