வினாத்தாள் கசிவு: ஹிமாச்சலில் தேர்வு ரத்து

புதுடில்லி: ஹிமாச்சல் மாநிலம், சம்பா மாவட்டம், சவுரி பகுதியில் அரசு மேல்நிலைப் பள்ளி இயங்கி வருகிறது. இங்கு, 10 மற்றும் பிளஸ் 2 வகுப்புகளுக்கு பொதுத்தேர்வு நடக்கிறது. நேற்று முன்தினம் 10ம் வகுப்பிற்கான ஆங்கில தேர்வு நடைபெற்றது.அப்போது பள்ளியின் தேர்வு கட்டுப்பாட்டாளர், தவறுதலாக பிளஸ் 2 வகுப்புக்கான ஆங்கில வினாத்தாள் கவரின் சீலை பிரித்து வெளியே எடுத்துவிட்டார்.இது எக்ஸாம் மித்ரா எனும் செயலியில் வீடியோவாகவும் பதிவாகியது. இதுகுறித்து ஹிமாச்சல் பள்ளிக்கல்வி வாரியத்திற்கு புகார் சென்றது.அவர்கள் விசாரணை நடத்தி வினாத்தாள் கசிந்ததை உறுதிப்படுத்தினர். இதையடுத்து நேற்று நடக்க வேண்டிய பிளஸ் 2 வகுப்புக்கான ஆங்கில தேர்வு மாநிலம் முழுதும் ரத்து செய்யப்பட்டது.புதிய தேர்வு தேதி விரைவில் அறிவிக்கப்படும் என, பள்ளிக்கல்வி வாரியச் செயலர் அறிவித்துள்ளார்.