விடியல் பயணத்திற்கு புதிய பஸ்கள்; பெண்கள் ஓட்டுகளை கவர யுக்தி

ஸ்ரீவில்லிபுத்துார்: 'விடியல் பயணத்திற்காக, தமிழகம் முழுதும் புத்தம் புதிய டவுன் பஸ்கள் இயக்கப்படுவது, வரும் சட்டசபை தேர்தலில், பெண்களின் ஓட்டுகளை கவர தி.மு.க.,வின் யுக்தி' என, அரசு போக்குவரத்து கழக ஊழியர்கள் தெரிவித்தனர்.2021 சட்டசபை தேர்தலில், தி.மு.க., தேர்தல் அறிக்கையில் சொல்லப்பட்ட மகளிருக்கான இலவச பயண திட்டத்தை, ஆட்சிக்கு வந்ததும் செயல்படுத்தினர். இலவச பஸ்களை பெண்கள் அடையாளம் கண்டு கொள்ள, முகப்பு பகுதியில் பிங்க் கலர் பெயின்ட் அடிக்கப்பட்டது. திட்டம் பெண்களுக்கு சவுகர்யமாக இருந்தபோதிலும், இயக்கப்பட்ட பஸ்கள் பழசாக இருந்ததால், பல்வேறு பிரச்னைகளை மகளிர் சந்தித்தனர். இப்பஸ்களில் பயணிக்கும் பெண்களின் எண்ணிக்கை குறித்து, தினமும் தரவுகளை மாநில அரசு நிர்வாகம் சேகரித்த போதிலும், குறைபாடு உள்ள பஸ்கள் இயக்கப்பட்டதால், பல இடங்களில் டிரைவர்-கண்டக்டர்களோடு பெண்கள் வாக்குவாதம் செய்தனர். இந்நிலையில் விடியல் பயணத் திட்டத்தை செம்மைப்படுத்தி, பெண்களிடம் அரசுக்கு நல்ல பெயர் ஏற்படுத்துவதற்கு, தற்போது தமிழகம் முழுதும் புத்தம் புதிய டவுன் பஸ்கள் இயக்கப்பட்டு வருகின்றன. இதை அந்தந்த மாவட்டங்களைச் சேர்ந்த அமைச்சர்களே கொடியசைத்து துவக்கி வைத்துள்ளனர்.'இப்படி செய்திருப்பது, வரும் சட்டசபை தேர்தலில் பெண்கள் ஓட்டுகளை தி.மு.க.,வுக்கு கவரும் யுக்தி' என, போக்குவரத்து கழக ஊழியர்கள் தெரிவித்தனர்.