காரைக்காலில் 5.2 செ.மீ., மழை

காரைக்கால்: காரைக்காலில் தொடர் கனமழையால் சாலைகளில் தேங்கிய தண்ணீரில் வாகன ஓட்டிகள் கடும் சிரமத்துடன் சென்றனர். டிட்வா புயல் எச்சரிக்கையால் காரைக்கால் மாவட்டத்தில் கடந்த இரு தினங்களாக தொடர் கனமழை பெய்து வருகிறது. இதனால் மாவட்டத்தில் நேற்று பள்ளி, கல்லுாரிகளுக்கு விடுமுறை அளிக்கப்பட்டது. நேற்று முன்தினம் காலை 8:30 மணி முதல் நேற்று காலை 8:30 மணி வரை 5.2 செ.மீ., மழை கொட்டி தீர்த்தது. தாழ்வானப் பகுதிகளில் தண்ணீர் தேங்கியது. ஆறு, குளம் உள்ளிட்ட நீர்நிலைகள் வேகமாக நிரம்பி வருகின்றன. விவசாய நிலங்கள் தண்ணீர் சூழ்ந்ததால், பயிர்கள் பாதிக்கப்பட்டுள்ளன. மேலும் புதிய பஸ் நிலையம், காமராஜர் சாலை, திருநள்ளார் சாலை உள்ளிட்ட முக்கிய சாலைகளில் மழைநீர் சூழ்ந்துள்ளது. ஓரிரு இடங்களில் மழைநீர் வெளியேற வழியின்றி சாலைகளில் தேங்கியுள்ளதால், வாகன ஒட்டிகள் கடும் சிரமத்துடன் வாகனங்களை ஓட்டிச்செல்கின்றனர். கன மழை காரணமாக பொது மக்களின் இயல்பு வாழ்க்கை வெகுவாக பாதிக்கப்பட்டது.