பிளே-ஆப் சுற்றில் இன்டர் மயாமி: இரண்டு கோல் அடித்தார் மெஸ்ஸி

நியூயார்க்: எம்.எல்.எஸ்., கால்பந்து போட்டியில் மெஸ்ஸி 2 கோல் அடித்து கைகொடுக்க, இன்டர் மயாமி அணி 4-0 என, நியூயார்க் சிட்டி அணியை வீழ்த்தியது.அமெரிக்கா, கனடாவில், மேஜர் லீக் கால்பந்து (எம்.எல்.எல்.,) தொடர் நடக்கிறது. நியூயார்க்கில் நடந்த லீக் போட்டியில் இன்டர் மயாமி, நியூயார்க் சிட்டி அணிகள் மோதின. துவக்கத்தில் இருந்து ஆதிக்கம் செலுத்திய மயாமி அணி 4-0 என்ற கோல் கணக்கில் வெற்றி பெற்றது. மயாமி அணிக்கு மெஸ்ஸி 2 (74, 86வது நிமிடம்), லுாயிஸ் சாரஸ் (83வது), பால்டசார் ரோட்ரிக்ஸ் (43வது) தலா ஒரு கோல் அடித்து கைகொடுத்தனர்.இதுவரை விளையாடிய 29 போட்டியில், 16 வெற்றி, 7 'டிரா', 6 தோல்வி என 55 புள்ளிகளுடன் இன்டர் மயாமி அணி 'பிளே-ஆப்' சுற்றுக்கான இடத்தை உறுதி செய்தது.நடப்பு எம்.எல்.எஸ்., சீசனில் அதிக கோல் அடித்த வீரர்கள் வரிசையில் மெஸ்ஸி (24 கோல்) முதலிடத்தில் நீடிக்கிறார். தவிர 8வது முறையாக, ஒரு போட்டியில் 2 அல்லது அதற்கு மேல் கோல் அடித்துள்ளார். எம்.எல்.எஸ்., கால்பந்து வரலாற்றில் இப்படி சாதித்த 4வது வீரரானார் மெஸ்ஸி. தவிர இவர், நடப்பு சீசனில் சகவீரர்கள் கோல் அடிக்க 37 முறை 'அசிஸ்ட்' செய்துள்ளார்.