கபடியில் பள்ளி மாணவியர் கில்லி

சென்னை: மாவட்ட கபடி போட்டியில், அசோக் நகர் மாநகராட்சி பள்ளி மாணவியர் அணி முதலிடத்தை பிடித்து வெற்றி பெற்றது. பள்ளிக்கல்வித்துறை சார்பில், சென்னை வருவாய் மாவட்ட கபடி போட்டி, செயின்ட் ஜார்ஜ் பள்ளி சார்பில், கீழ்ப்பாக்கத்தில் நேற்று முன்தினம் நடந்தது. இதில், மாணவியருக்கான 17 வயது பிரிவில், அம்பத்துார், நுங்கம்பாக்கம், அடையார், தண்டையார்பேட்டை, முகப்பேர் உள்ளிட்ட 23 மண்டல பள்ளிகள் பங்கேற்றன. அனைத்து போட்டிகள் முடிவில், இறுதிப் போட்டிக்கு விருகம்பாக்கம் மண்டலம், அசோக் நகர் மாநகராட்சி மகளிர் அரசு பள்ளி மற்றும் நுங்கம்பாக்கம் மண்டலம், மெட்ராஸ் சேவா சதன் பள்ளி அணிகள் தகுதி பெற்றன. விறுவிறுப்பான இறுதிப் போட்டியில், துவக்கத்தில் இருந்தே அரசு பள்ளி ஆதிக்கம் செலுத்தி, 15 - 8 என்ற கணக்கில் வெற்றி பெற்று, முதலிடத்தை கைப்பற்றியது. இரண்டாவது மற்றும் மூன்றாம் இடத்தை மெட்ராஸ் சேவா சதன் பள்ளி மற்றும் அரும்பாக்கம் மண்டல ஜெய்கோபால் கரோடியா பெண்கள் பள்ளி கைப்பற்றியது.