டாஸ்மாக் ஊழியர்களை நிரந்தரமாக்க வேண்டும்! ஊழியர் சம்மேளன நிர்வாக குழு வலியுறுத்தல்

பொள்ளாச்சி: கோரிக்கைகளை வலியுறுத்தி ஜன. முதல் வாரத்தில் வேலை நிறுத்தத்தில் ஈடுபடுவது என சி.ஐ.டி.யு. டாஸ்மாக் ஊழியர் மாநில சம்மேள நிர்வாக குழு கூட்டத்தில் தீர்மானிக்கப்பட்டது. சி.ஐ.டி.யு. டாஸ்மாக் ஊழியர் மாநில சம்மேள நிர்வாக குழு கூட்டம் பொள்ளாச்சியில் நடந்தது. மாநில தலைவர் முருகன் தலைமை வகித்தார். சி.ஐ.டி.யு. மாவட்ட பொருளாளர் வேலுசாமி பேசினார். கூட்டத்தில், டாஸ்மாக் ஊழியர்களை பணி நிரந்தரம் செய்து காலமுறை ஊதியம் வழங்க வேண்டும். காலி பாட்டில்களை திரும்ப பெறும் திட்டத்திற்கு ஊழியர்களை பயன்படுத்த கூடாது. பணி நிரந்தரம் என்ற தீர்ப்புக்கு எதிராக, தமிழக அரசு மேல்முறையீடு செய்யக்கூடாது. இவை உள்ளிட்ட கோரிக்கைகளை முன்வைத்து வரும் ஜன., முதல் வாரத்தில் வேலை நிறுத்தத்தில் ஈடுபடுவது என, மாநில நிர்வாக குழு கூட்டத்தில் முடிவு செய்யப்பட்டது. கூட்டத்தில் கோவை மாவட்ட டாஸ்மாக் ஊழியர் சங்க மாவட்ட தலைவர் ஜான்அந்தோனிராஜ், மாவட்ட செயலாளர் செந்தில்பிரபு மற்றும் மாநில, மாவட்ட நிர்வாகிகள் கலந்து கொண்டனர். மாவட்ட பொருளாளர் ராமகிருஷ்ணன் நன்றி கூறினார். சம்மேளன பொதுச்செயலாளர் திருச்செல்வம் நிருபர்களிடம் கூறியதாவது: டாஸ்மாக் நிறுவனம், மதுபான சில்லறை விற்பனை கடைகளைத் தொடங்கி, 22 ஆண்டுகள் நிறைந்துள்ளது. டாஸ்மாக் கடைகளில் பணியாற்றும் ஊழியர்கள் தொகுப்பு ஊதியத்தில் பணியாற்றுகின்றனர். பணிநிரந்தர தகுதி வழங்கல் சட்டம் 1981, பிரிவு மூன்றின் படி, ஒரு தொழிலாளி இரண்டு ஆண்டுகளில், 480 நாட்கள் பணிபுரிந்தால், நிரந்தரமாக்க வேண்டும் என்று சட்டம் கூறுகிறது. ஆனால், அரசாங்கமும் டாஸ்மாக் நிர்வாகமும் ஊழியர்களை நிரந்தரம் செய்யாமல் வைத்திருப்பது ஒரு முன்மாதிரி அரசு நிறுவனத்துக்கு ஏற்புடையதல்ல.தமிழகத்தில், சட்டப்படி டாஸ்மாக் ஊழியர்களை பணிநிரந்தரம் செய்ய வேண்டும் என்று அரசிடம்வலியுறுத்தி கேட்கிறோம். இவ்வாறு, அவர் கூறினார்.