மேம்பாலத்தில் ரீல்ஸ்: அத்துமீறும் இளைஞர்கள்

கிணத்துக்கடவு: கிணத்துக்கடவு மேம்பாலத்தில் இரவு நேரத்தில் இளைஞர்கள் 'ரீல்ஸ்' எடுத்து சமூக வலைதளங்களில் பதிவிடுவது அதிகரித்து வருகிறது. பொள்ளாச்சி - கோவை தேசிய நெடுஞ்சாலையில் பயணிக்கும் இளைஞர்கள் பலர், பைக்கில் செல்லும்போது கிணத்துக்கடவு மேம்பாலம் மற்றும் முள்ளுப்பாடி மேம்பாலத்தில் பைக்கை நிறுத்தி, மையத்தடுப்பில் நின்று மொபைல்போனில் 'ரீல்ஸ்' மற்றும் 'செல்பி' எடுக்கின்றனர். மேலும், சிலர் ஆபத்தை உணராமல் நள்ளிரவு நேரத்தில் ஆபத்தை உணராமல் மேம்பாலத்தில் இருக்கும் மையத்தடுப்பில் படுத்து 'ரீல்ஸ்' வீடியோ எடுத்து, சமூக வலைதளங்களில் பதிவிடுகின்றனர். ரோட்டில் அதிவேகமாக வரும் வாகனங்கள் மோதினால், விபத்து ஏற்படும் அபாயம் உள்ளது. ஆனால், அதைப்பற்றியெல்லாம் கவலையின்றி வீடியோ எடுப்பதிலேயே கவனம் செலுத்துகின்றனர். இதனால், ரோட்டில் பயணிக்கும் வாகன ஓட்டுநர்களுக்கும், அவ்வப்போது இடையூறு ஏற்படுகிறது. எனவே, இரவு நேரத்தில் பாலத்தில் வீடியோ எடுப்பவர்கள் மீது போலீசார் தகுந்த நடவடிக்கை எடுக்க வேண்டும், என, மக்கள் வலியுறுத்துகின்றனர்.