பாலத்தின் அடியில் கழிவுகள் மழைநீர் செல்வதில் சிக்கல்

நடுவீரப்பட்டு: கீழ்மாம்பட்டு பாலத்தில் அடியில் உள்ள கழிவுகளை அகற்ற பொதுமக்கள் கோரிக்கை விடுத்துள்ளனர். பண்ருட்டி அடுத்த கீழ்மாம்பட்டிலிருந்து நெல்லித்தோப்பு வழியாக முக்கூட்டு ஓடை செல்கிறது. இந்த ஓடையில் கீழ்மாம்பட்டு சாலையில் தரைபாலமும்,கொட்டிக்கோணாங்குப்பம் சாலையில் ஒரு புதிய உயர்மட்ட பாலமும், நெல்லத்தோப்பு சாலையில் ஒரு புதிய உயர்மட்ட பாலமும் கட்டப்பட்டுள்ளது. இதில் கீழ்மாம்பட்டு சாலையில் மட்டும் புதிய பாலம் கட்டாமல், பழைய தரைபாலம் உள்ளது. கடந்த சில தினங்களுக்கு முன் பெய்த கனமழையில், ஓடையில் அடித்து வரப்பட்ட செடிகள் உள்ளிட்ட கழிவுகள் தரைபாலத்தின் அடியில் உள்ள பெரிய அளவிலான குழாய்களில் அடைத்துக்கொண்டுள்ளது. இதனால் தற்போது பெய்ய உள்ள மழையில், மழைநீர் தடையின்றி ஓடுவதில் சிரமம் உள்ளது. மேலும் இந்த பாலத்தின் கைப்பிடி கட்டைகள் உடைந்துள்ளதால், இந்த வழியாக செல்லும் வாகன ஓட்டிகள் அச்சத்துடன் செல்ல வேண்டிய நிலை உள்ளது. மாவட்ட நிர்வாகம் இந்த கீழ்மாம்பட்டு சாலையில் புதிய பாலம் கட்டவும், தற்போது பாலத்தின் அடியில் அடைத்துக்கொண்டுள்ள கழிவுகளை அகற்றவும் நடவடிக்கை எடுக்க வேண்டும்.