நெடுஞ்சாலையில் இரு ஆண்டுகளில் நடந்த விபத்துகளில்.. 70 பேர் பலி பார்க்கிங் ஏரியாவான இணைப்பு சாலையால் மக்கள் அச்சம்

திருவள்ளூர்: சென்னை - பெங்களூரு தேசிய நெடுஞ்சாலை இணைப்பு சாலை 'பார்க்கிங்' ஏரியாவாக மாறி வருவதால், தேசிய நெடுஞ்சாலையில் விபத்துகள் அதிகரித்து வருகின்றன. இரு ஆண்டுகளில் நடந்த 200 விபத்துகளில், 70 பேர் உயிரிழந்துள்ள நிலையில், 385 பேர் படுகாயமடைந்தனர். இதனால், 20க்கும் மேற்பட்ட கிராம மக்கள் அச்சத்தில் உள்ளனர். சென்னை - பெங்களூரு தேசிய அதிவிரைவு நெடுஞ்சாலையில், தினமும் ஒரு லட்சத்திற்கும் மேற்பட்ட வாகனங்கள் சென்று வருகின்றன. நான்கு வழிச்சாலையான இந்த நெடுஞ்சாலை, 654 கோடி ரூபாயில் ஆறு வழிச்சாலையாக விரிவு படுத்த திட்டமிடப்பட்டு, மூன்று கட்டங்களாக பணிகள் நடந்து வருகின்றன. அதன்படி, மதுரவாயல் -- ஸ்ரீபெரும்புதுார் வரை, 25 கி.மீ.,க்கு 2022ல் பணி துவங்கப்பட்டது. அதேபோல், ஸ்ரீபெரும்புதுார் -- காரப்பேட்டை வரையில், 34 கி.மீ., மற்றும் காரப்பேட்டை -- வாலாஜாபேட்டை வரையில், 36 கி.மீ.,க்கு 2019ல் பணி துவங்கி நடந்து வருகிறது. கடந்த 2024ல் நிறை வடைய வேண்டிய பணிகள், தற்போது வரை நடந்து வருகிறது. இந்த நெடுஞ்சாலையில், பூந்தமல்லி - ஸ்ரீபெரும்புதுார் வரை திருமழிசை, செம்பரம்பாக்கம், பாப்பன்சத்திரம், தண்டலம், இருங்காட்டுகோட்டை என, 20க்கும் மேற்பட்ட கிராமங்கள் உள்ளன. இந்த நெடுஞ்சாலையில் அரசு, தனியார் பள்ளி, கல்லுாரிகள், தொழிற் சாலைகள், தனியார் மருத்துவமனை, மின்வாரிய அலுவலகம், சிப்காட் உட்பட பல்வேறு அரசு மற்றும் தனியார் அலுவலகங்கள் உள்ளன. இந்த நெடுஞ்சாலையின் இருபுறமும் போடப்பட்டுள்ள இணைப்பு சாலையை, 20க்கும் மேற்பட்ட கிராம மக்கள் இருவழிச் சாலையாக பயன் படுத்தி வருகின்றனர். இந்த இணைப்பு சாலை, கனரக வாகனங்கள் நிறுத்துமிடமாகவும், சாலையோர கடைகள் ஆக்கிரமிப்பு பகுதியாகவும் மாறியுள்ளது. இதனால் , இச் சாலையை பயன்படுத்தும் 20க்கும் மேற்பட்ட கிராம மக்கள் மற்றும் வாகன ஓட்டிகள் கடும் அவதிப்பட்டு வருகின்றனர். தேசிய நெடுஞ்சாலையில் ஏற்படும் போக்குவரத்து நெரிசல் காரணமாக, இணைப்பு சாலை வழியே செல்லும் வாகனங்கள், சாலையோரம் நிறுத்தப்பட்டுள்ள இடையூறு வாகனங்களால் கடும் சிரமப்பட்டு வருகின்றன. குறிப்பாக, பாப்பன்சத்திரம் - ஸ்ரீபெரும்புதுார் வரை 'பார்க்கிங்' ஏரியாவாக மாறிய இணைப்பு சாலையால், தேசிய நெடுஞ்சாலையில் விபத்து கள் அதிகரித்துள்ளன. இதில், ஸ்ரீபெரும்புதுார் காவல் நிலைய எல்லைக்குட்பட்ட செட்டிபேடு - மாம்பாக்கம் வரை உள்ள பகுதிகளில் மட்டும், 11 மாதங்களில் நடந்த 110 விபத்துகளில், 25 பேர் உயிரிழந்துள்ளனர். 200 பேர் படுகாயமடைந்துள்ளனர். அதேபோல், 2024ம் ஆண்டு நடந்த 90 விபத்துகளில், 45 பேர் உயிரிழந்துள்ள நிலையில், 185 பேர் படுகாயமடைந்துள்ளனர். இரு ஆண்டுகளில் நடந்த 200 விபத்துகளில், 70 பேர் உயிரிழந்துள்ள நிலையில், 385 பேர் படுகாயமடைந்துள்ளனர். இதில், திருமழிசை - செட்டிபேடு வரை, சிறு அளவிலே விபத்துகள் நடந்துள்ளதாக திருமழிசை போலீசார் தெரிவித்தனர். எ னவே, சம்பந்தப்பட்ட அதிகாரிகள் தேசிய நெடுஞ்சாலையின் இணைப்பு சாலையில் நிறுத்தப் பட்டுள்ள வாகனங்களை அப்புறப்படுத்தி, போக்குவரத்தை சீரமைக்க வேண்டுமென, கிராம மக்கள் மற்றும் வாகன ஓட்டிகள் கோரிக்கை விடுத்துள்ளனர்.

நடவடிக்கை எடுக்க வேண்டும்

நெடுஞ்சாலைத் துறை அதிகாரி கூறியதாவது: சென்னை - பெங்களூரு தேசிய அதிவிரைவு நெடுஞ்சாலையின் இணைப்பு சாலையில் நிறுத்தப்பட்டுள்ள வாகனங்கள் மீது சம்பந்தப்பட்ட காவல் துறையினர் தான் நடவடிக்கை எடுக்க வேண்டும். இவ்வாறு அவர் கூறினார்.

இணைப்பு சாலையில் கடும் சிரமம்

இ துகுறித்து அரசு பேருந்து ஓட்டுநர் கூறியதாவது: சென்னை - பெங்களூரு தேசிய அதிவிரைவு நெடுஞ்சாலையில் போக்குவரத்து நெரிசல் ஏற்பட்டால், இணைப்பு சாலை வழியே சென்று விடலாம். ஆனால், இணைப்பு சாலை கனரக வாகனங்கள் நிறுத்துமிடமாக மாறியுள்ளதால் கடும் சிரமப்பட்டு வருகிறோம். இவ்வாறு அவர் கூறினார்.