ஒரு வாரத்தில் முடிய வேண்டிய போர் 4 வருடமாக தொடர்கிறது: புடினை கடுமையாக சாடிய டிரம்ப்

வாஷிங்டன்: ''உக்ரைன் உடனான போரை புடின் ஏன் தொடர்கிறார் என்று தெரியவில்லை. ஒரு வாரத்தில் வெல்லக்கூடிய போர் 4 வருடமாக தொடர்கிறது'' என ரஷ்ய அதிபர் புடினை அமெரிக்க அதிபர் டொனால்டு டிரம்ப் கடுமையாக சாடியுள்ளார்.அமெரிக்க வெள்ளை மாளிகையில் அர்ஜென்டினா அதிபர் ஜேவியர் மிலேயுடனான சந்திப்புக்கு பிறகு அதிபர் டிரம்ப் கூறியதாவது: விளாடிமிர் புடினுக்கும் எனக்கும் இடையே நல்ல உறவு இருந்ததால் நான் மிகவும் ஏமாற்றமடைந்துள்ளேன். அவர் ஏன் இந்தப் போரைத் தொடர்கிறார் என்று எனக்குத் தெரியவில்லை. இந்தப் போர் அவருக்கு மிகவும் மோசமாக இருந்தது. அவர் நான்கு வருடங்களாக ஒரு போரில் ஈடுபடுகிறார். அதை ஒரு வாரத்தில் அவர் வென்றிருக்க வேண்டும். அவர் ஏராளமான வீரர்களை இழந்திருக்கலாம், அநேகமாக, இது ஒரு பயங்கரமான போர். இரண்டாம் உலகப் போருக்குப் பிறகு நடந்த மிகப்பெரிய இறப்பு இது. எல்லாவற்றையும் விட இது பெரியது. இந்தியாவிற்கும் பாகிஸ்தானுக்கும் இடையிலான ஒரு போர் உட்பட எட்டுக்கும் மேற்பட்ட போர்களை முடிவுக்குக் கொண்டு வந்தேன். இந்தியாவிற்கும், பாகிஸ்தானுக்கும் பெரும் ஆற்றல் இருந்தது என்று நான் நினைக்கிறேன். அதில் நாங்கள் சிறப்பாகச் செயல்பட்டோம். ரஷ்யாவிற்கும் உக்ரைனுக்கும் இடையிலான போரை முடிவுக்கு வர வேண்டும். அமெரிக்க உற்பத்தியாளர்களிடம் இருந்து வாங்காமல், தென் அமெரிக்க நாட்டில் இருந்து சோயாபீன்ஸ் வாங்குவதன் மூலம் அமெரிக்காவிற்கும், அர்ஜென்டினாவிற்கும் இடையில் பிளவை ஏற்படுத்த சீனா முயற்சி செய்கிறது. சீனா வேண்டுமென்றே நமது சோயாபீன்ஸை வாங்காமல் நமது விவசாயிகளுக்கு சிரமத்தை ஏற்படுத்துவது பொருளாதார ரீதியாக விரோதமான செயல். அதற்கு பழிவாங்கும் விதமாக, சீனாவுடன் வணிகத்தை நிறுத்துவது குறித்து நாங்கள் வர்த்தக குழுவினர் உடன் பரிசீலித்து வருகிறோம். இவ்வாறு அதிபர் டிரம்ப் கூறியுள்ளார்.