கோவை மாவட்ட கிரிக்கெட் சங்கம் சார்பில் காசா கிராண்ட் கோப்பைக்கான ஐந்தாம் டிவிஷன் கிரிக்கெட் லீக் போட்டி வட்டமலைபாளையம் ராமகிருஷ்ணா இன்ஜினீயரிங் கல்லுாரி மைதானத்தில் நடந்தது. இதில் அப்பாசாமி கிரிக்கெட் கிளப் மற்றும் ரத்தினம் கிரிக்கெட் கிளப் அணிகள் மோதின. முதலில் பேட்டிங் செய்த ரத்தினம் அணி 70 ரன் குவித்த ஸ்ரீவரதனாவின் பொறுப்பான ஆட்டத்தால் 40.2 ஓவர்களில் 166 ரன்கள் சேர்த்தது. 32 ரன் எடுத்த அய்யப்பன் நிதானமாக விளையாடினார். வெற்றி பெற 167 ரன்கள் தேவை என்ற இலக்குடன் களமிறங்கிய அப்பாசாமி அணி வீரர்கள் பிரபு 31 ரன்கள் மற்றும் பிரதீப் 36 ரன்கள் எடுத்து 38 ஓவர்களில் ஏழு விக்கெட் இழப்புக்கு 167 ரன்கள் எடுத்து வெற்றி பெற்றனர். அதேபோல் பி.எஸ்.ஜி. மருத்துவக் கல்லுாரி மைதானத்தில் நடந்த மற்றொரு போட்டியில் கோயம்புத்துார் ரைடர்ஸ் அணி 36 ரன்கள் வித்தியாசத்தில் ஆர்.பி. குரூப்ஸ் அணியை வீழ்த்தியது. முதலில் விளையாடிய கோயம்புத்துார் ரைடர்ஸ் அணி 46.3 ஓவர்களில் அனைத்து விக்கெட்களையும் இழந்து 170 ரன்கள் சேர்த்தனர். அணிக்காக சரண் 39 ரன்கள் எடுத்து பொறுமையாக விளையாடினார். அடுத்து விளையாடிய ஆர்.பி. குரூப்ஸ் அணியின் செந்தில் வேல் 52 ரன்கள் எடுத்தார். மற்ற வீரர்கள் சொற்ப ரன்கள் எடுதது அவுட் ஆனார்கள். இதனால், அந்த அணி 44 ஓவர்களில் 134 ரன்களுக்கு ஆல் அவுட்டானது.