இருட்டுக்கடை அல்வா கடையில் சிப்ஸ் பாக்கெட்கள் பறிமுதல் | Tirunelveli | Food Safety Department conducts raid | unlicensed halwa shop சபரிமலை சென்று திருநெல்வேலி வழியாக திரும்பும் ஐயப்ப பக்தர்கள் டவுன் நெல்லையப்பர் கோயில் பகுதியில் உள்ள அல்வாக் கடைகளில் கூட்டம் கூட்டமாக முண்டியடித்து அல்வா வாங்கி செல்கின்றனர். அங்கு வந்த மாவட்ட உணவு அலுவலர் புஷ்பராஜ் தலைமையிலான உணவு பாதுகாப்புத் துறை அதிகாரிகள் இருட்டுக்கடை உள்பட அனைத்து அல்வா கடைகளிலும் அதிரடி ரெய்டில் ஈடுபட்டனர். அல்வாவின் தரம், சுகாதாரம், அல்வா தயாரிக்கும் இடம் சுகாதாரமாக உள்ளதா, லைசென்ஸ் உள்ளிட்ட பல்வேறு விஷயங்களை ஆய்வு செய்தனர். இருட்டுக்கடையில் நேந்திரல் சிப்ஸ் பாக்கெட்டுகளில் கடையின் பெயர் மற்றும் சிப்ஸ் தயாரிக்கப்பட்ட தேதி இல்லாததால் 10 சிப்ஸ் பாக்கெட்டுகளை பறிமுதல் செய்தனர். பெரும்பாலான கடைகள் குறிப்பிட்ட ஒரே பெயரை பயன்படுத்தி வியாபாரம் செய்வது கண்டறியப்பட்டது. அதிகாரிகள் குறிப்பிட்ட அந்த பெயரை பயன்படுத்தாமல் தங்களுக்கான லைசென்சில் என்ன பெயரில் அனுமதி வாங்கப்பட்டுள்ளதோ அந்த பெயரை பயன்படுத்த வேண்டும் என எச்சரித்தனர். மேலும் அல்வா பார்சலில் கடையின் பெயர், தயாரிக்கப்பட்ட தேதி மற்றும் காலாவதி தேதி உள்ளிட்ட அனைத்து விவரங்களையும் குறிப்பிடிருக்க வேண்டும் என கேட்டுக் கொண்டனர். கடை உரிமையாளர்கள் அவசர அவசரமாக கடையின் பெயரை மாற்றினர். இந்த திடீர் ரெய்டில் ஐந்துக்கும் மேற்பட்ட சிறிய கடைகள் லைசென்ஸ் வாங்காமல் அல்வா விற்பனை செய்தது தெரியவந்தது. உடனடியாக விற்பனையை நிறுத்தும்படியும் ஒரு வாரத்திற்கு லைசென்ஸ் வாங்க வேண்டும் இல்லாவிட்டால் கடையில் உள்ள அனைத்து பொருட்களும் பறிமுதல் செய்யப்படும் என எச்சரித்தனர். திடீர் சோதனையால் அல்வா பிரியர்களிடையே பரபரப்பு ஏற்பட்டது.