மகாராஷ்டிர மாநிலம் மும்பை மற்றும் புறநகர் பகுதிகளில் முக்கிய போக்குவரத்தாக, புறநகர் ரயில்கள் விளங்குகின்றன. தினமும் பல லட்சம் பயணிகள் மின்சார ரயில்களில் பயணிக்கின்றனர். காலை மற்றும் மாலை வேளைகளில் பீக் அவர்ஸ்களில் ரயில்களில் கட்டுக்கடங்காத கூட்டம் அலைமோதுவது வழக்கம். ரயிலுக்குள் செல்ல முடியாத அளவுக்கு படிக்கட்டிலேயே பயணிகள் தொங்கியபடி பயணிப்பர். இன்று காலை மும்பையில் இருந்து தானேக்கு ஒரு மின்சார ரயில் புறப்பட்டது. அந்த ரயிலில் பயணிகள் கூட்டம் அலைமோதியது. நிறைய பயணிகள் படிக்கட்டுகளில் தொங்கியபடி பயணித்தனர். தானே அருகே உள்ள மும்ப்ரா அருகே ரயில் சென்றபோது எதிரே ஒரு மின்சார ரயில் வந்தது. இரு ரயில்களுக்கும் இடையிலான இடைவெளி 5 அடிக்குள்தான் இருந்தது என கூறப்படுகிறது. அப்போது, எதிர்பாராதவிதமாக மும்பை டு தானே ரயிலில் படிக்கட்டில் தொங்கிய 10 பயணிகள் தண்டவாளத்தில் விழுந்தனர். படுகாயமடைந்த அவர்களை உடனடியாக மருததுவமனைக்கு ரயில்வே போலீசார் கொண்டு சென்றனர். வழியிலேயே 5 பேர் பலியானார்கள். 4 பேருக்கு தீவிர சிகிச்சை அளிக்கப்படுகிறது. விபத்துக்கான காரணம் குறித்து ரயில்வே தலைமை பிஆர்ஓ விளக்கினார். ஒரு வளைவில் ரயில் சென்றபோது விபத்து நடந்துள்ளது. அப்போது எதிரே ஒரு மின்சார ரயில் வந்துள்ளது. இரு தண்டவாளங்களுக்கு இடைப்பட்ட தூரம் 5 அடிக்குள்தான் இருக்கும். இப்படிப்பட்ட சூழலில் படிக்கட்டில் தொங்கிய ஒரு பயணி பெரிய பேக்கை மாட்டியிருந்தார். அது, எதிரே வந்த ரயிலில் தொங்கிய பயணிகள் மீது பட்டதால், அவரும், அவருடன் சேர்ந்து மேலும் மற்ற பயணிகளும் கீழே விழுந்திருக்கலாம் என அந்த அதிகாரி தெரிவித்தார் மும்பை டு தானே ரயிலில் இருந்து 5 பயணிகள் விழுந்து இறந்த சம்பவம் பயணிகள் மத்தியில் கடும் அதிர்ச்சியை ஏற்படுத்தியது. இந்த சம்பவத்தைத் தொடர்ந்து, ரயில்வே அதிரடி முடிவை எடுத்துள்ளது. இனி, மும்பை புறநகர் ரயில் பெட்டிகள் தயாரிக்கப்படும்போதே, தானியங்கி கதவு வசதிகளுடன் தயாரிக்கப்படும். இப்போதுள்ள ரயில் பெட்டிகளிலும் தானாக திறந்து மூடும் கதவுகள் மிக விரைவில் பொருத்தப்படும் என, ரயில்வே அறிவித்துள்ளது.