பிரபல நடிகர் ராஜேஷ் மறைந்தார் அதிர்ச்சியில் திரை உலகம்! தமிழ் சினிமாவின் மூத்த நடிகர் ராஜேஷ் சென்னையில் இன்று காலமானார். அவருக்கு வயது 75. காலை திடீரென அவருக்கு மாரடைப்பு ஏற்பட்டுள்ளது. சோக நிகழ்வாக மருத்துவமனை கொண்டு செல்லும் வழியிலேயே அவரது உயிர் பிரிந்தது. ராஜேஷின் உடல் சென்னை, ராமாபுரத்தில் உள்ள அவரது இல்லத்தில் அஞ்சலிக்காக வைக்கப்பட்டுள்ளது. திருவாரூர் மாவட்டம், மன்னார்குடியில் 1949 டிசம்பர் 20ல் பிறந்தவர் ராஜேஷ். கலை மீதான மோகத்தில் பள்ளி ஆசிரியர் பணியை துறந்து அரிதாரம் பூசி சினிமாவில் நடித்தார். 1974ல் கே.பாலசந்தர் இயக்கிய அவள் ஒரு தொடர்கதை என்ற படத்தில் சிறு வேடத்தில் நடித்தார். வெள்ளித் திரையில் அறிமுகமான முதல் படம் இது. கன்னிப் பருவத்திலே, அந்த 7 நாட்கள், அச்சமில்லை அச்சமில்லை உள்ளிட்ட ஏராளமான படங்களில் நடித்துள்ளார். ஹீரோ, வில்லன், குணச்சித்ரம் என தமிழ், தெலுங்கு, மலையாளம் உள்ளிட்ட மொழிகளில் 150க்கும் அதிகமான படங்களில் நடித்து உள்ளார். இவரது மனைவி ஜோன் சில்வியா ஏற்கனவே இறந்துவிட்டார். திவ்யா, தீபக் என்ற ஒரு மகள், மகன் உள்ளனர். ராஜேஷின் திடீர் மறைவு திரையுலகினர், ரசிகர்கள் இடையே அதிர்ச்சியையும், சோகத்தையும் ஏற்படுத்தி உள்ளது. அவரது மறைவுக்கு பலரும் இரங்கல் தெரிவித்து வருகின்றனர்.