சென்னை மெட்ரோ ரயில் திட்டத்தின் 2ம் கட்ட பணிக்காக 2020ல் அடிக்கல் நாட்டப்பட்டது. மத்திய, மாநில அரசு நிதியில் இத்திட்டம் நிறைவேற்றப்பட உள்ளது. சமீபத்தில் பிரதமர் மோடியை சந்தித்த முதல்வர் ஸ்டாலின் மெட்ரோ ரயில் திட்டத்துக்கு நிதி ஒதுக்க கேட்டு இருந்தார். பிரதமர் மோடி தலைமையில் நடைபெற்ற மத்திய அமைச்சர் அவை கூட்டத்தில், 63 ஆயிரத்து 246 கோடி ரூபாய் மதிப்பிலான மெட்ரோ ரயில் திட்டத்துக்கு ஒப்புதல் அளிக்கப்பட்டது. கூட்டத்துக்கு பின் பேசிய அமைச்சர் அஸ்வினி வைஷ்ணவ், வேகமாக வளர்ந்து வரும் நகரான சென்னை மிக முக்கிய பொருளாதார மையம். நகரத்திற்கு தேவையான உள்கட்டமைப்பை உருவாக்குவது முக்கியம் மெட்ரோ ரயில் திட்டம் 2027ல் முடியும் என கூறினார். மெட்ரோ ரயில் 2திட்டத்தால், சென்னை மக்களின் போக்குவரத்து நெரிசல் குறையும், பொருளாதாரம் மேம்படும் என்று பிரதமர் மோடி தெரிவித்துள்ளார். சென்னை மெட்ரோ ரயில்-2 திட்டம், சென்னையின் வடக்கில் இருந்து தெற்கு, கிழக்கில் இருந்து மேற்கு என மொத்தம் 119 கிலோ மீட்டர் நீளத்துக்கு அமைய உள்ளது. மாதவரம் டு சிப்காட், கலங்கரை விளக்கம் டு பூந்தமல்லி பைபாஸ், மாதவரம் டு சோளிங்கநல்லூர் என 3 வழி தடங்களில் திட்டம் நிறைவேற்றப்படும். 128 மெட்ரோ நிலையங்கள் அமைய உள்ளன.