தமிழக அரசு மேல்நிலை பள்ளிகளில், முதுநிலை பட்டதாரி ஆசிரியர்கள், உடற்கல்வி இயக்குநர், கணினி பயிற்றுனர் ஆகிய பணியிடங்களுக்கு அக். 12ல் தேர்வு நடந்தது. 1,996 பணி இடங்களுக்கு முதுநிலை பட்டதாரிகள் 2.36 லட்சம் பேர் தேர்வு எழுதினர். முடிவுகள் நேற்று வெளியிடப்பட்டன. அதில் கட்டாய தமிழ் பாட தேர்வில் 85,000த்துக்கும் அதிகமானோர் பெயில் ஆகியுள்ளனர். தமிழக அரசு பணிகளுக்கு தமிழ் எழுத, படிக்க தெரிய வேண்டும் என்பதற்காக, அனைத்து போட்டித் தேர்வுகளிலும் 2022ல் கட்டாய தமிழ் தேர்வு அறிமுகம் செய்யப்பட்டது. தமிழ் தேர்வில் மொத்தம் 50 மதிப்பெண் உண்டு. அதில் 20 எடுத்தால் பாஸ் ஆகலாம். பாஸ் ஆனால் தான் பாடம் சார்ந்த விடைத்தாளை மதிப்பீடு செய்வார்கள். இத்தேர்வில் 85,000 பேருக்கு மேல் அதாவது 36 சதவீதம் பேர் தோல்வி அடைந்துள்ளனர். பிரதான பாடம் சார்ந்த தேர்வை இவர்கள் சிறப்பாக எழுதியிருந்தாலும் தமிழில் தோற்றதால் அந்த விடைத்தாள்கள் திருத்தப்படாது. இந்த தேர்வை எழுதியவர்கள் இளநிலை, முதுநிலை, கல்வியியல் என குறைந்தது மூன்று பட்டங்களை பெற்றவர்கள். அதற்கு மேல் எம்.பில்., பிஎச்.டி. பட்டம் பெற்றவர்களும் தேர்வு எழுதியுள்ளனர்.