இந்தியா வந்துள்ள வங்கதேச அணி, 2 போட்டிகள் கொண்ட டெஸ்ட் தொடரில் விளையாடுகிறது. முதல் டெஸ்ட், சென்னை சேப்பாக்கம் மைதானத்தில் கடந்த 19ம் தேதி தொடங்கியது. முதலில் பேட்டிங் செய்த இந்திய அணி தனது முதல் இன்னிங்சில் 376 ரன் குவித்தது. இந்தியா தரப்பில் அஸ்வின் 113 ரன் எடுத்தார். தொடர்ந்து தனது முதல் இன்னிங்சை தொடங்கிய வங்கதேசம் 149 ரன்னில் ஆல் அவுட் ஆனது. 227 ரன் முன்னிலையுடன் 2வது இன்னிங்சை தொடங்கிய இந்தியா, 64 ஓவர்களில் 4 விக்கெட்டை மட்டும் இழந்து 287 ரன் எடுத்து டிக்ளேர் செய்தது. 515 ரன் என்ற கடின வெற்றி இலக்கை நோக்கி களமிறங்கிய வங்கதேச அணி, நேற்றைய 3ம் நாள் ஆட்ட நேர முடிவில் 4 விக்கெட்டுகளை இழந்து 158 ரன் அடித்திருந்தது. ஷாண்டோ 51 ரன்னுடனும், ஷகிப் அல் ஹசன் 5 ரன்னுடனும் களத்தில் இருந்தனர். இந்தியா தரப்பில் அஸ்வின் 3 விக்கெட்டுகளை வீழ்த்தி இருந்தார். இன்று 4வது நாள் ஆட்டத்தில் அஸ்வின், ஜடேஜாவின் சுழற்பந்து வீச்சை சமாளிக்க முடியாமல் வங்கதேச வீரர்கள் அடுத்தடுத்து ஆட்டமிழந்தனர். ஷான்டோ 82 ரன், ஷாகிப் 25 ரன்னுடனும் அவுட்டாகி வெளியேறினர். பிறகு வந்த லிட்டன் தாஸ் -1 ரன், ஹசன் மிராஜ் -8, தஸ்கின் அஹமது -5, ஹசன் மக்முத்- 7 ரன்னுக்கும் ஆட்டம் இழந்தனர். கடைசியில் வங்களதேச அணியின் பேட்டிங் 62.1 ஓவர்களில் அனைத்து விக்கெட்டையும் இழந்து 234 ரன்னுடன் முடிவுக்கு வந்தது. 280 ரன் வித்தியாசத்தில் இந்திய அணி அபார வெற்றி பெற்றது. இந்தியா தரப்பில் அஸ்வின் -6, ஜடேஜா -3 , பும்ரா -1 விக்கெட்டும் வீழ்த்தினர். இரு அணிகளுக்கு இடையிலான 2வது டெஸ்ட் போட்டி கான்பூரில் வரும் 27ம் தேதி துவங்குகிறது.