அடிமடியில் கை வைக்கும் இஸ்ரேல்! இது நடந்தால் மொத்த ஈரானும் காலி ஈரான் ஆதரவில் லெபனான் நாட்டில் இருந்து ஹிஸ்புல்லா பயங்கரவாத அமைப்பு இயங்கி வருகிறது. சமீபத்தில் இஸ்ரேல் நடத்திய ராக்கெட் தாக்குதலில் ஹிஸ்புல்லா தலைவர் ஹசன் நஸ்ரல்லா கொல்லப்பட்டார். அவருடன் ஈரான் ராணுவத்தின் மூத்த கமாண்டர்களில் ஒருவரான அப்பாஸ் நில்போரூஷனும் இறந்தார். இதனால் ஆத்திரமடைந்த ஈரான் சில தினங்களுக்கு முன் இஸ்ரேல் மீது 200க்கு மேற்பட்ட ஏவுகணைகளை ஏவியது. இதில் இஸ்ரேலின் இரண்டு விமானபடை தளங்கள், உளவு அமைப்பான மொசாட் தலைமையகம் சேதம் அடைந்தது என ஈரான் சொல்கிறது. ஆனால் ஈரான் அனுப்பிய ஏவுகணைகளை வானிலேயே சுட்டு தள்ளிவிட்டோம் என இஸ்ரேல் சொல்கிறது. இஸ்ரேலுக்கு சேதம் சிறிதோ, பெரிதோ எதுவாக இருந்தாலும் ஈரானுக்கு பதிலடி தரப்போவது உறுதியாகிவிட்டது. அது கடுமையான தாக்குதலாக இருக்கும் என உலக நாடுகள் அஞ்சுகின்றன. ஈரானின் 6 நகரங்களில் உள்ள அணு உலைகள், எண்ணெய் கிணறுகளை குறிவைத்து தாக்குதல் நடத்த இஸ்ரேல் ராணுவம் திட்டமிட்டுள்ளது. ஈரான் அணு உலைகள் மீது தாக்குதல் நடத்த கூடாது என அமெரிக்கா எச்சரித்துள்ளது. இதனால் ஈரானின் எண்ணெய் கிணறுகள், மின் விநியோக கட்டமைப்புகளை இஸ்ரேல் தாக்க திட்டமிட்டுள்ளது. ஈரானின் எண்ணெய் பொருளாதாரத்தை ஸ்தம்பிக்க வைப்பது இஸ்ரேலின் திட்டமாகும்.