அமெரிக்காவில் அல் குவைதா பயங்கரவாதிகள் விமானங்களை கடத்தி, கட்டடங்கள் மீது மோதி நடத்திய தாக்குதலை போன்ற ஒரு மிகப் பெரும் தாக்குதலை இஸ்ரேல் மீது நடத்த, ஹமாஸ் பயங்கரவாதிகள் திட்டமிட்டிருந்த தகவல் இப்போது வெளியாகி அதிர்சியை ஏற்படுத்தி உள்ளது. கடந்தாண்டு அக்டோபர் 7ல், இஸ்ரேலுக்குள் நுழைந்து ஹமாஸ் பயங்கரவாதிகள் பெரும் தாக்குதலில் ஈடுபட்டனர்; அதே நேரத்தில் ஏவுகணைகளையும் செலுத்தி தாக்கினர். இதில், இஸ்ரேல் தரப்பில் 1,200 பேர் உயிரிழந்தனர்; 250க்கும் மேற்பட்டோர் பிணைக் கைதிகளாக பிடித்து செல்லப்பட்டனர். ஹமாஸ் பயங்கரவாதிகளின் இந்த திடீர் தாக்குதல், இஸ்ரேலையும், உலக நாடுகளையும் அதிர்ச்சி அடைய வைத்தது. ஆனால், இது திடீரென நடந்த தாக்குதல் அல்ல. இரண்டு ஆண்டுகளுக்கு மேலாக திட்டமிடப்பட்டு மேற்கொள்ளப்பட்டது என்ற ரகசிய தகவல் வெளியாகி உள்ளது. இது குறித்து அமெரிக்க ஊடகங்களில் வெளியாகியுள்ள செய்திகளில் கூறப்பட்டு உள்ளதாவது: அல் குவைதா பயங்கரவாதிகள், 2001 செப்டம்பர் 11ல் விமானங்களை கடத்திச் சென்று, அமெரிக்கா, நியூயார்க் நகரின் இரட்டை கோபுர கட்டடங்களில் மோதினர். இதில், ஆயிரக்கணக்கானோர் கொல்லப்பட்டனர். இது போன்ற ஒரு மிகப் பெரும் தாக்குதலை இஸ்ரேல் மீது நடத்த ஹமாஸ் திட்டமிட்டது. இது தொடர்பாக, தனக்கு ஆதரவு அளிக்கும் ஈரானுடனும், அண்டை நாடான லெபனானில் இருந்து இயங்கும் ஹெஸ்புலா பயங்கரவாத அமைப்புடனும் ஆலோசனை நடத்தியது. கடந்த 2021 ஜனவரியில் துவங்கிய இந்த ஆலோசனை மிகவும் ரகசியமாக வைக்கப்பட்டது. இது போன்ற தாக்குதல் நடத்தினால், இஸ்ரேல் பதிலடி கொடுக்கும் என்றும், அதை எதிர்கொள்ளும் வகையில் தயார் நிலையில் இருக்க தேவையானவற்றை செய்ய வேண்டும் என்றும் தீர்மானிக்கப்பட்டது.