வெளிநாடுகளுக்கு ஏற்றுமதி செய்யப்படும் உணவு பொருட்களுடன் கலந்து போதை பொருள் கடத்தப்படுவதாக மத்திய போதைப் பொருள் கடத்தல் தடுப்பு பிரிவு அதிகாரிகளுக்கு தகவல் கிடைத்தது. இதையடுத்து, நாட்டின் பல இடங்களில் நடத்தப்பட்ட தீவிர சோதனையில், கடந்த மாதம் டில்லியில் உள்ள குடோனில் போதைப் பொருட்களுடன் மூன்று பேர் கைது செய்யப்பட்டனர். அவர்களிடம் இருந்து 50 கிலோ போதைப் பொருட்கள் பறிமுதல் செய்யப்பட்டன. கைதான நபர்களிடம் நடத்திய விசாரணையில், பிரபல சினிமா தயாரிப்பாளருக்கு அதில் தொடர்பிருப்பது தெரிய வந்தது. இது குறித்த விரிவான விசாரணையில், தமிழ் சினிமா தயாரிப்பில் ஈடுபட்டு வந்த ஜாபர் சாதிக், கடத்தல் கும்பலின் மூளையாக செயல்பட்டது தெரிந்தது. அவரை கைது செய்ய போதை பொருள் கடத்தல் பிரிவு அதிகாரிகள் நடவடிக்கை எடுத்தனர். எனினும், அதிகாரிகள் கையில் சிக்காமல் பல மாநிலங்களுக்கு பயணித்து தலைமறைவாக இருந்தார். தீவிர தேடுதல் வேட்டைக்கு பின், இம்மாத துவக்கத்தில் டில்லியில் ஜாபர் சாதிக் கைதானார். மத்திய போதைப் பொருள் கடத்தல் தடுப்பு பிரிவு அதிகாரிகள் அவரை காவலில் எடுத்து விசாரித்து வருகின்றனர். ஜாபர் சாதிக் தலைமையிலான நெட்வொர்க் அமெரிக்கா, நியூசிலாந்து, ஆஸ்திரேலியா உள்ளளிட்ட நாடுகளுக்கு 2,000 கோடி ரூபாய் மதிப்பிலான 3,500 கிலோ போதை பொருட்களை கடத்திய விவரம் வெளியானது.