உலக சுற்றுச்சூழல் தினத்தையொட்டி, கடந்த ஆண்டு ஜூன் 5ம் தேதி டில்லியில் உள்ள புத்த ஜெயந்தி பூங்காவில், அரச மரக்கன்றை பிரதமர் மோடி நட்டார். தாயின் பெயரில் ஒரு மரம் என்ற இயக்கத்தையும் அவர் துவக்கி வைத்து, அம்மாவின் பாசத்தை நினைவுப்படுத்தும் வகையில் ஒவ்வொருவரும் மரம் நட வேண்டும் என நாட்டு மக்களுக்கு வேண்டுகோள் விடுத்தார். தாயின் பெயரில் ஒரு மரம் இயக்கத்தில் 2024 செப்டம்பருக்குள் 80 கோடி மரக்கன்றுகளை நட மத்திய சுற்றுச்சூழல் அமைச்சகம் இலக்கு நிர்ணயித்தது. ஆனால், இலக்கு முடிவதற்கு 5 நாட்களுக்கு முன்பே, 80 கோடி மரக்கன்றுகள் நடப்பட்டன. அரசு துறைகள், என்ஜிஓக்கள், மக்களின் பங்களிப்புடன் இந்த சாதனை சாத்தியமானது. பிரதமர் மோடி கடந்த ஜூலை மாதம் இங்கிலாந்துக்கு சென்றபோது மன்னர் சார்லசுக்கு சோனோமோ மரக்கன்றை பரிசாக வழங்கினார். அப்போது, அம்மா பெயரில் ஒரு மரம் இயக்கத்தின் சாதனைகளை அறிந்து இங்கிலாந்து மன்னர் சார்லஸ் வியந்தார். இந்நிலையில், நேற்று முன்தினம் பிரதமர் மோடி, 75வது பிறந்த நாளை கொண்டாடினார். மோடிக்கு இங்கிலாந்து மன்னர் சார்லஸ் பிறந்த நாள் பரிசாக கடம்ப மரக்கன்றை அனுப்பி வைத்து இருந்தார். சுற்றுச்சூழல் பாதுகாப்பில் இருவருக்கும் உள்ள பொறுப்புணர்பின் பிரதிபலிப்பாகவும், அம்மா பெயரில் ஒரு மரம் இயக்கத்தால் ஈர்க்கப்பட்டும் அந்த மரக்கன்றை மன்னர் சார்லஸ் பிறந்தநாள் பரிசாக அனுப்பியதாக, டில்லியில் உள்ள இங்கிலாந்து தூதரகம் தெரிவித்திருந்தது. மன்னர் சார்லஸ் அனுப்பிய மரக்கன்றை எண் 7 லோக் கல்யாண் மார்க்கில் உள்ள தனது இல்லத்தில் இன்று மோடி நட்டு வைத்தார். செடிக்கு அவரே தண்ணீரும் விட்டார். கடம்ப மரத்தில் உருண்டை வடிவில் நறுமணமுள்ள, செம்மஞ்சள் நிற பூக்கள் பூக்கும். இது, வாசனை திரவிய தயாரிப்பில் பயன்படுத்தப்படுகிறது. புராணங்களில் கடம்ப மரம் பற்றிய விவரங்கள் உள்ளன. கடம்ப மரம் முருகனுக்கும், திருமாலுக்கும் உரியது என சங்கப்பாடல்கள் தெரிவிக்கின்றன. சுற்றுச்சூழலை பாதுகாப்பதிலும், சுற்றுப்புறத்தை தூய்மையாக வைத்திருப்பதிலும் பிரதமர் மோடி காட்டும் ஆர்வத்தை போற்றும் விதமாக, அவர் மரக்கன்றை நடும் வீடியோவை மக்கள் சமூக வலைதளங்களில் வேகமாக ஷேர் செய்து வருகின்றனர். #KingCharles #Gift #KadambTree #PMNarendraModi #75thBirthdayCelebration #EkPedMaaKeNaam #PMModi #Plants #Sapling #DelhiResidence #TreePlantation #SustainableFuture #GreenIndia #EnvironmentalAwareness #CelebratingNature #GiftOfNature #BirthdayWishes #ChangingLives #TreeLovers #EcoFriendly