நாட்டை உலுக்கிய கொல்கத்தா பெண் டாக்டர் பாலியல் பலாத்காரம் மற்றும் கொலை வழக்கில் மருத்துவக் கல்லூரி முதல்வர் சந்தீப் கோஷ் கைது செய்யப்பட்டு இருப்பது பரபரப்பை ஏற்படுத்தி உள்ளது. கொல்கத்தா ஆர்ஜி கர் அரசு மருத்துவமனையில் ஆகஸ்ட் 9ம் தேதி நைட் டூட்டியில் இருந்த 31 வயதான இளம் பயிற்சி டாக்டர் பாலியல் பலாத்காரம் செய்து கொடூரமான முறையில் கொல்லப்பட்டார். முதலில் கொல்கத்தா போலீஸ் விசாரித்து வந்த இந்த வழக்கு பின்னர் சிபிஐக்கு மாற்றப்பட்டது. சஞ்சய் ராய் என்பவன் கைது செய்யப்பட்டான். அவன் பெண் டாக்டரை பலாத்காரம் செய்து கொலை செய்ததற்கான எல்லா ஆதாரங்களையும் சிபிஐ திரட்டியது. ஒற்றை ஆளாய் சஞ்சய் ராய் தான் இந்த சம்பவத்தில் ஈடுபட்டான் என்று சிபிஐ அதிகாரிகள் உறுதியாக கூறினர். ஆனால் மருத்துவக் கல்லூரி மருத்துவமனையின் உயர்மட்ட அதிகாரிகளுக்கும் இதில் தொடர்பு இருக்கலாம் என்ற குற்றச்சாட்டு பூதாகரமாக எழுந்தது.