ஊட்டி பிங்கர்போஸ்ட் பகுதியில் அரசு மருத்துவக்கல்லூரி மருத்துவமனை கட்டும் பணிகள் முடிந்துள்ளது. இதனை மக்கள் பயன்பாட்டுக்காக துவக்கி வைக்க முதல்வர் ஸ்டாலின் இரண்டு நாள் பயணமாக கோவை வந்தார். கோவை ஏர்போர்ட்டில் திமுகவினர் சார்பில் மேளதளங்கள் முழங்க ஸ்டாலினுக்கு வரவேற்பு அளிக்கப்பட்டது. அமைச்சர் செந்தில்பாலாஜி அறிவுறுத்தலின்பேரில் கோவை ஒருங்கிணைந்த மாவட்ட செயலாளர்கள் கார்த்திக், தொண்டாமுத்தூர் ரவி, முருகேசன் வழிநெடுகிலும் உற்சாக வரவேற்பு அளிக்கப்பட்டது. முதல்வர் ஸ்டாலினை வரவேற்க அரசு பஸ்களில் பொதுமக்களை திமுக நிர்வாகிகள் அழைத்து வந்தனர். கோவை கோட்டத்திற்கு உட்பட்ட 45 பஸ்கள் வாடகைக்கு எடுக்கப்பட்டதாக அதிகாரிகள் தெரிவித்தனர். ஆனால் 100க்கும் மேற்பட்ட பேருந்துகள் திமுகவினரை அழைத்து வர பயன்படுத்தப்பட்டுள்ளது. இது குறித்து போக்குவரத்து அதிகாரிகளிடம் கேட்டபோது, வேறு போக்குவரத்து கழக டிப்போக்களில் இருந்து பஸ் வாடகைக்கு எடுக்கப்பட்டிருக்கலாம் என தெரிவித்தனர். திமுக கட்சி விழாவுக்கு அரசு பஸ்கள் இயக்கப்பட்டதால் பல இடங்களில் குறித்த நேரத்துக்கு பஸ் வராமல் மக்கள் தவித்தனர்.