சூர்யா படக்குழுவினரிடம் போலீஸ் துருவி துருவி விசாரணை! actor surya Film | karthik subburaj | Russians கார்த்திக் சுப்புராஜ் இயக்கும் படத்தில் நடிகர் சூர்யா நடிக்கிறார். இப்படத்தின் 2ம் கட்ட படிப்பிடிப்பு கடந்த மாதம் 26ம் தேதி முதல் ஊட்டியில் நடந்து வருகிறது. ஊட்டியில் உள்ள நவாநகர் பேலஸ் என்ற இடத்தில் கடந்த 8ம் தேதி சண்டை காட்சிகள் படமாக்கப்பட்டன. அப்போது சூர்யா தலையில் லேசான காயம் ஏற்பட்டது. ஷூட்டிங் நிறுத்தப்பட்டது. சூர்யா சென்னைக்கு புறப்பட்டு சென்றார். இந்த படப்பிடிப்பில் கலந்து கொள்வதற்காக, ரஷ்யாவை சேர்ந்த 155 சினிமா கலைஞர்கள் கடந்த 27ம் தேதி சுற்றுலா விசாவில் வந்தனர். அவர்கள் ஊட்டியில் 3 ஓட்டல்களில் தங்க வைக்கப்பட்டனர். ஷூட்டிங் நிறுத்தப்பட்டதால் 42 ரஷ்யர்கள் மட்டும் திரும்பி சென்றனர். எஞ்சிய 113 பேர் ஊட்டியிலேயே தொடர்ந்து தங்கி இருந்தனர். வெளிநாட்டை சேர்ந்தவர்கள் ஊட்டியில் தங்கினால், அவர்கள் பற்றி தகவல்களை ஓட்டல் நிர்வாகத்தினர் போலீசாருக்கு தெரிவிக்க வேண்டும் என விதி உள்ளது. ஆனால் ரஷ்யர்கள் தங்கியிருந்த விவரத்தை போலீசாருக்கு ஓட்டல் நிர்வாகம் தெரிவிக்கவில்லை. சுற்றுலா விசாவில் வந்த வெளிநாட்டினர் படப்பிடிப்பில் நடிக்க கூடாது என்ற விதியும் உள்ளது. ரஷ்யர்கள் தங்கி நடிப்பது பற்றி ஏன் தெரிவிக்கவில்லை என சம்பந்தப்பட்ட ஓட்டல்களுக்கு போலீசார் நோட்டீஸ் அனுப்பினர். போலீஸ் எச்சரித்த பிறகும் ரஷ்யர்கள் தொடர்ந்து தங்க ஓட்டல் நிர்வாகம் அனுமதித்தது. இந்நிலையில் இன்று எஸ்பி நிஷா உத்தரவின் பேரில் தனிப்படை போலீசார் ஊட்டியில் உள்ள வெல்பேக் ரெசிடென்சி, சபையர் மற்றும் சபையர் கார்டன் வியூ ஆகிய ஓட்டல்களில் அதிரடியாக சோதனை நடத்தினர். அங்கு தங்கியிருந்த 113 ரஷ்யர்களையும் வெளியேற்றினர். அதைத் தொடர்ந்து, அனைவரையும் படப்பிடிப்பு குழுவினர் சென்னைக்கு அழைத்துச் சென்றனர். இதனை தொடர்ந்து போலீசார் ரஷ்ய குழுவினரை சுற்றுலா விசாவில் அழைத்து வந்தது யார் என படக்குழுவினரிடம் தோண்டித் துருவி விசாரணை மேற்கொண்டு வருகின்றனர்.