கோவை கணபதி பகுதியை சேர்ந்த 85 வயது ராமலட்சுமி வயது மூப்பு காரணமாக நேற்று காலமானார். மறுநாள் உடல் அடக்கம் செய்ய திட்டமிட்ட குடும்பத்தினர், உடலை ப்ரீசர் பாக்ஸில் வைத்தனர். இன்று காலை அக்கம் பக்கத்தினர், உறவினர்கள் உடலுக்கு அஞ்சலி செலுத்திக் கொண்டிருந்தனர். காலை 10.30க்கு பவர் கட் ஆனால், ஜெனரேட்டர் மூலம் ப்ரீசர் பாக்சுக்கு மின்சாரம் கொடுக்கப்பட்டது. ஜெனரேட்டர் இயங்கிக் கொண்டிருந்தபோதே, அதில் பெட்ரோலை ஊற்றியுள்ளனர். இதனால் ஜெனரேட்டரில் தீ பிடித்து ப்ரீசர் பாக்ஸ் வரை பரவியது. உடலை சுற்றி அமர்ந்திருந்த உறவினர்கள் அறையில் இருந்து வெளியே ஓடினர். உறவினர்கள் பத்மாவதி, பானுமதி, ஶ்ரீராம், ராஜேஸ்வரன் ஆகிய 4 பேர் தீயில் சிக்கி காயமடைந்தனர். நான்கு பேரையும் உறவினர்கள் மீட்டு சிகிச்சைக்காக ஆஸ்பிடலில் சேர்த்தனர். அங்கு பத்மாவதி இறந்தார். மற்ற மூவருக்கும் தொடர்ந்து சிகிச்சை அளிக்கப்படுகிறது. துக்கம் விசாரிக்க சென்ற இடத்தில் எதிர்பாராதவிதமாக ஏற்பட்ட தீ விபத்தில் சிக்கி பெண் பலியான சம்பவம் உறவினர்களை சோகத்தில் ஆழ்த்தியது.