மிரட்டும் புயல்... 54 விமானம் திடீர் ரத்து chennai airport cancels 54 flights | cyclone ditwah | IMD இலங்கையில் மையம் கொண்டிருந்த டிட்வா புயல் தமிழகம் நோக்கி வேகமாக நகர்ந்து வருகிறது. தமிழகத்தின் கடலோர மாவட்டங்களுக்கும் வடமாவட்டங்களுக்கும் கன முதல் அதி கனமழைக்கான எச்சரிக்கை விடுக்கப்பட்டுள்ளது. இந்த மாவட்டங்களை மணிக்கு 55 முதல் 80 கிலோ மீட்டர் வேகத்தில் பலத்த சூறை காற்றும் தாக்கும் என்று சென்னை வானிலை மையம் எச்சரித்துள்ளது. காற்று மற்றும் மழை பாதிப்பு காலை முதலே துவங்கி விட்டது. இதன் காரணமாக சென்னை ஏர்போர்ட்டில் 54 விமானங்களின் சேவை அதிரடியாக நிறுத்தப்பட்டன. பெரும்பாலும் மதுரை, திருச்சி, தூத்துக்குடி, பெங்களூரு, ஹைதராபாத், யாழ்பாணம் உள்ளிட்ட ஊர்களுக்கு செல்லும் விமானங்களும், அங்கிருந்து வருகை தரும் விமானங்களும் நிறுத்தப்பட்டு இருக்கின்றன. இவை அனைத்தும் ஏடிஆர் என்னும் சிறிய ரக விமானங்கள் ஆகும். கனமழை மற்றும் பலத்த காற்று நீடிக்கும் சமயத்தில் இந்த விமானங்கள் வானில் பறப்பது ஆபத்தானது என்பதால் இந்த நவடிக்கை எடுக்கப்பட்டு இருக்கிறது. இன்று காலை முதல் இரவு வரை சிறிய ரக விமான சேவை நிறுத்தப்பட்டுள்ளன. புயலின் தாக்கத்தை பொறுத்து அடுத்தக்கட்ட நடவடிக்கைகள் மேற்கொள்ளப்படும் என்று சென்னை ஏர்போர்ட் அறிவித்துள்ளது. திடீரென 54 விமானங்களின் சேவை நிறுத்தப்பட்டதால், ஏற்கனவே டிக்கெட் புக் செய்திருந்த பயணிகள் கடும் அவதி அடைந்தனர். அவர்கள் மாற்று ஏற்பாடை செய்து கொள்ளும்படி விமான நிறுவனங்கள் அறிவுறுத்தின.