புதுச்சேரியில் தவெக தலைவர் விஜய் ரோடு ஷோ நடத்த அனுமதி கேட்டு முதல்வர் ரங்கசாமி மற்றும் போலீஸ் டிஜிபி அலுவலகத்தில் தவெகவினர் மனு அளித்தனர். கட்சியின் பொதுச்செயலாளர் ஆனந்த், பிரசார பிரிவு பொதுச்செயலாளர் ஆதவ் அர்ஜூனா பலமுறை நேரில் சென்று வலியுறுத்தியும் அனுமதி கிடைக்கவில்லை. ரோடு ஷோவுக்கு பதில் பொதுக்கூட்டம் நடத்த போலீசார் அனுமதி வழங்கினர். அதன்படி, உப்பளம் புதிய துறைமுகம் எக்ஸ்போ மைதானத்தில் நாளை விஜய் பொதுக்கூட்டம் நடக்கிறது. 5 ஆயிரம் பேருக்கு மட்டுமே அனுமதி. க்யூஆர் கோடு நுழைவுச்சீட்டு கட்டாயம். தமிழகத்தை சேர்ந்தவர்கள் பங்கேற்க முடியாது என பல நிபந்தனை விதிக்கப்பட்டுள்ளது. இந்நிலையில் பொதுக்கூட்டத்துக்கு வரும் தவெகவினர் கடைபிடிக்க வேண்டிய வழிகாட்டு நெறிமுறைகளை ஆனந்த் வெளியிட்டுள்ளார். அவரது அறிக்கை: விஜயின் புதுச்சேரி மக்கள் சந்திப்பு நிகழ்ச்சியில் 5 ஆயிரம் பேர் மட்டுமே அனுமதிக்கப்படுவார்கள். தமிழகத்தை சேர்ந்தவர்களுக்கு கண்டிப்பாக அனுமதி இல்லை. தன்னை நேசிக்கும் மக்களின் பாதுகாப்பில் எள்ளளவும் சமரசம் செய்துகொள்ளாதவர் விஜய். எனவே நிகழ்ச்சிக்கான வழிகாட்டு நெறிமுறைகளை மக்கள் கண்டிப்பாக கடைபிடிக்க வேண்டும்.