காஷ்மீர் மாநிலம் பஹல்காமில் 2 பாகிஸ்தானியர் உட்பட 3 பயங்கரவாதிகள் நடத்திய கொடூர தாக்குதலில் 26 சுற்றுலாப் பயணிகள் இறந்தனர். பெயரை கேட்டு கேட்டு இந்து என்பதை தெரிந்து கொண்ட பிறகு பயங்கரவாதிகள் சுட்டுக் கொன்றது நாடு முழுவதும் கடும் அதிர்ச்சி அலையை ஏற்படுத்தியுள்ளது. இந்த சம்பவத்தில் மத்திய அரசுக்கு எதிராக சர்ச்சைக்குரிய வகையில் ஒரு எம்எல்ஏ பேசியது பரபரப்பை ஏற்படுத்தியது. பாஜ ஆட்சி நடக்கும் அசாம் மாநிலத்தில் AIUDF எனப்படும் அகில இந்திய ஐக்கிய ஜனநாயக முன்னணி கட்சி எதிர்கட்சியாக உள்ளது. காங்கிரசுக்கு அடுத்த பெரிய கட்சி இந்த கட்சியின் எம்.எல்.ஏவாக இருப்பவர் அமினுல் இஸ்லாம். 2019ல் புல்வாவாமாவில் நடந்த பயங்கரவாத தாக்குதலும், நேற்று முன்தினம் பஹல்காமில் நடந்த தாக்குதலும் மத்திய அரசின் சதியால் நடந்தது என எம்எல்ஏ அமினுல் இஸ்லாம் கூறினார்.