காங்கிரஸ் நிர்வாகி கவிதா, திமுகவில் இணைந்தது சர்ச்சையை ஏற்படுத்தியதால், அது தொடர்பான போட்டோவையும், தகவலையும் மாஜி அமைச்சர் செந்தில் பாலாஜி நீக்கியது பரபரப்பை ஏற்படுத்தி உள்ளது. கரூர் நகர காங்கிரஸ் மகளிர் அணி தலைவி கவிதா, திடீரென திமுகவில் இணைந்தார். அவர் தங்கள் கட்சியில் சேர்ந்த புகைப்படத்தை செந்தில் பாலாஜி தன் சமூக வலைதள பக்கத்தில் வெளியிட்டிருந்தார். திமுகவில் கவிதாவை சேர்த்ததற்கு தமிழக காங்கிரஸ் நிர்வாகிகள் கடும் எதிர்ப்பு தெரிவித்தனர். இது தொடர்பாக செந்தில் பாலாஜிக்கு, தமிழக மகளிர் காங்கிரஸ் தலைவி ஹசீனா சையது கடிதம் எழுதினார். அதில் தமிழக காங்கிரசில் கவிதா, எந்த பதவியிலும் இல்லை. அவர் மகளிர் காங்கிரஸ் பொறுப்பில் இருப்பதாக நீங்கள் குறிப்பிட்டது தவறு. அதை நீக்க வேண்டும் என்று கேட்டுக் கொண்டார். விவகாரம் சர்ச்சையானதால் சோசியல் மீடியாவில் போட்ட போட்டோவையே செந்தில் பாலாஜி நீக்கி விட்டார். இதனால் குழப்பம் ஏற்பட்டது. இந்த நிலையில் செந்தில் பாலாஜி நடவடிக்கைக்கு ஹசீனா சையத் நன்றி சொல்லி அறிக்கை வெளியிட்டார்.