2021 சட்டசபை தேர்தலின் போது திமுக கூட்டணி சார்பில் ஈரோடு தொகுதியில் காங்கிரஸ் வேட்பாளர் திருமகன் ஈவேரா போட்டியிட்டு வென்றார். 2023 துவக்கத்தில் உடல் நலக்குறைவால் காலமானார். அதே ஆண்டில் வந்த இடைத்தேர்தலில் திருமகன் தந்தையும் மூத்த காங்கிரஸ் தலைவருமான ஈவிகேஎஸ் இளங்கோவன் போட்டியிட்டு வென்றார். கடந்த ஆண்டு இறுதியில் அவரும் உடல் நலக்குறைவால் காலமானார். இப்போது ஈரோடு கிழக்கு தொகுதிக்கு மீண்டும் இடைத்தேர்தல் அறிவிக்கப்பட்டுள்ளது. இந்த முறை திமுக வேட்பாளரை களம் இறக்க அனுமதிக்க வேண்டும் என்று கூட்டணி கட்சியான காங்கிரசிடம் திமுக தலைவர் ஸ்டாலின் பேச்சு வார்த்தை நடத்தினார். ஸ்டாலின் விருப்பத்தை ஏற்று ஈரோடு கிழக்கு தொகுதியை திமுகவுக்கு விட்டு கொடுப்பதாக நேற்று இரவு காங்கிரஸ் மாநில தலைவர் செல்வப்பெருந்தகை அறிவித்தார். சூட்டோடு சூடாக இன்று காலை தங்கள் வேட்பாளரை திமுக அறிவித்துள்ளது. ஈரோடு கிழக்கில் விசி சந்திரகுமார் போட்டியிடுவார் என்று ஸ்டாலின் அதிகாரப்பூர்வமாக தெரிவித்தார். இவர் திமுகவின் கொள்கை பரப்பு இணைச்செயலாளராக உள்ளார். சந்திரகுமார் எம்ஏ படித்தவர். ஜவுளி மொத்த வியாபாரம் செய்து வருகிறார்.