கோவையில் நடந்த அதிமுக முன்னாள் அமைச்சர் வேலுமணி இல்ல திருமண விழாவில் தமிழக பாஜ தலைவர் அண்ணாமலை மற்றும் முக்கிய நிர்வாகிகள் பங்கேற்றது பரபரப்பை ஏற்படுத்தியது. இதன் பின்னணி குறித்து இப்போது மேலும் சில முக்கிய தகவல்கள் வெளியாகி உள்ளன. வேலுமணி மகன் விஜய் விகாஷ்-தீக்சனா திருமண விழா கோவையில் விமரிசையாக நடந்தது. தங்கமணி, செங்கோட்டையன், நத்தம் விஸ்வநாதன், தாமோதரன், அன்பழகன் உள்ளிட்ட அதிமுக தலைவர்கள், திரளான தொண்டர்கள் பங்கேற்றனர். மிகவும் எதிர்பார்க்கப்பட்ட கட்சியின் பொதுச் செயலாரான பழனிசாமி பங்கேற்கவில்லை. அவருக்கு பதில் அவரது மனைவி ராதா மற்றும் மகன் மிதுன் கலந்து கொண்டனர். தமிழக பா.ஜ. தலைவர் அண்ணாமலை, மத்திய இணை அமைச்சர் முருகன், முன்னாள் கவர்னர் தமிழிசை மற்றும் மாவட்ட நிர்வாகிகளும் பங்கேற்றனர். முன்னாள் அமைச்சர்கள் தங்கமணி, செங்கோட்டையன், நத்தம் விஸ்வநாதன், செ.ம.வேலுசாமி மற்றும் ராதாகிருஷ்ணனிடம் அண்ணாமலை காட்டிய நெருக்கம், அவர்களிடம் ஏற்பட்ட முக மலர்ச்சி அனைவரிடமும் ஆச்சரியத்தை ஏற்படுத்தியது.